המלך בשדה: האד' מצאנז קלויזנבורג וועט פראווען שבת נחמו אין "מחנה צאנז" נאך צייט אפשניט פון איבער פינעף יאר

פרייטאג פ' ואתחנן • י''ד אב תשפ"ה | בחצרות הקודש

די בחורי חמד תלמידי הישיבות אין מחנה הקיץ צאנז קלויזענבורג אין וואודבארן זענען נעכטן ליל שישי געכאפט געווארן אין איבערראשונג ביים ערהאלטן די פריידיגע בשורה אז כ"ק אדמו"ר מצאנז קלויזענבורג שליט"א וועט ארויסקומען צו די קאנטרי, לעשות את השבת אין "מחנה צאנז" און דערביי מאציל זיין מזיו הודו והדרו אויף בני ישיבתו הקדושה און די תושבי מחנות הקיץ דחסידי צאנז קלויזענבורג.

די פריידיגע בשורה רופט ארויס גרויס התרגשות ביי די תלמידים, נאך א צייט אפשניט פון איבער פינעף יאהר וואס די רבי שליט"א איז נישט ארויסגעקומען פראווענען א שבת אין קעמפ, נאכדעם די רבי שליט"א פארט נישט ארויס אויף אפרוה, און גייט אן מיט זיין טאג טעגליכע עבודת הקודש במעונו אין בארא פארק, האט דער רבי אצינד אנגענומען די הפצרות פון די חסידים צו פירן א שבת בקרב תלמידי המחנה.

במיוחד ווערט שבת נחמו אפצגעצייכנט אין צאנז קלויזענבורג אלס א היסטארישער שבת, ווען מיט גענוי איין און דרייסיג יאהר צוריק שבת נחמו תשנ"ד האט דער רבי שליט"א געפראוועט דעם שבת ראשונה אויף א גרויסע פארנעם נאכן איבערנעמען די כתר האדמורו"ת ככלות השלושים צו די הסתלקות פון אביו הרה"ק בעל שפע חיים מצאנז קלויזענבורג זי"ע, דער שבת אחז טאקע דעמאלט אפגעראכטן געווארן אין די מחנות הקיץ דחסידי צאנז קלויזנבורג אויף די קאנטרי בערג.

אין די קארצע צייט פארבליבן צום געהויבענעם שבת האבן די עסקנים בליץ שנעל איינגערישט דעם רבינס דירה און די פריוואטע בית תפילה אינעם קעמפ וואס איז שוין נישט געווען אין באנוץ עטליכע יאהר, אזוי אויך ארבעטן די עסקנים צוצושטעלן אכסניות פאר די פילצאליגע געסט וואס קומען ארויס די קאנטרי מיטצוהאלטן די געהויבענע שבת כשהמלך בשדה.