ויחן את פני העיר: היסטארישער מסיבת קבלת פנים אפגעהאלטן לכבודו פון האד' מסאטמאר אין לשכת הביד"ץ העדה החרדית

דינסטאג פ' תולדות • כ"ז חשון תשפ"ו | בחצרות הקודש

א היסטארישע מעמד קבלת פנים איז נעכטן אפגעהאלטן געווארן לכבודו הרם פונעם חשובן גאסט כ"ק אדמו"ר מסאטמאר שליט"א, אינעם לשכת הביד"ץ העדה החרדית ביים מקום מושב בית דין, ביי וועלכן עס האבן מפאר כבוד געווען די שרי התורה הגאונים הגדולים חברי הביד"ץ שליט"א און די חברי וועד הפועל פון די עדה החרדית.

דער ספרא דדיינא הר"ר יצחק שלמה בלוי הי"ו האט מקבל פנים געווען דעם רבי'ן שליט"א אין נאמען פון די שרי התורה חברי הבית דין צדק, דערנאך האט מען געהאט די זכי' צו הערן די ווערטער פון די צוויי חברי הביד"צ הגאון הגדול רבי אברהם יצחק אולמאן שליט"א און הגאון הגדול רבי יהושע ראזענבערגער שליט"א גאב"ד קרית הרמ"א אין בית שמש, ווי ביידע האבן ארויסגעברענגט די גרויסע זכי' וואס תשובי ארצינו הקדושה פארמאגט מיטן רבינס באזוך, ובפרט ווען מען שטייט אין אזא ברענענדיגע צייט פונעם גזירת הגיוס, האט מען די זכי' אז די רבי איז בתוכינו מחזק צו זיין דעם יהדות הצרופה צו שטיין פעלזן פעסט בדרכי המלחמה.

דערנאך האט מען געהאט די זכי' צו הערן קורצע אבער גאר שטארקע דברות קודש פון כ"ק אדמו"ר מסאטמאר שליט"א, ווי דער רבי האט ארויסגעברענגט זיין גרויס התרגשות צו קענען קומען אהער אינעם בית הגדול שבירושלים, און שטיין לימינם פון די שומרי משמרת הקודש, די חברי בית דין צדק וועלכע שטייען אויפן פראנט לוחם צו זיין מלחמת ה' בעוז וברמה אקעגן די פירצות הדת און בפרט די ביטערע גזירת הגיוס וואס איז ליידער עומד על הפרק די לעצטע תקופה און, דערביי האט דער רבי שליט"א גאר שארף ארויסגעטראטן אקעגן די מחוקקי חוק הגיוס וואס גייען איין אויף פשרות און ארבעטן אויף א שיתוף פעולה מפקיר צו זיין טויזנטער נשמות מישראל צום שמד הגיוס רח"ל. די רבי האט פארשפראכן צו טוהן וואס ער קען עד שידו מגעת לוחם צו זיין קעגן די שרעקליכע גזירה, אנן מהכא ואתון מהתם, און אויסגעפירט בברכות לרוב פאר די שרי התורה חברי הבית דין צדק.