היסטאריע אין בעלזא: האד' מבעלזא וועט ערשטמאליג ארויספארן ממעונו אין ירושלים אויף א שבת מיט די בוני המוסדות

מיטוואך פ' בא • ג' שבט | בחצרות הקודש

אין א היסטארישע שריט בחצר הקודש בעלזא איז היינט באשעטעטיגט געווארן אז כ"ק אדמו"ר מבעלזא שליט"א וועט אין אן ערשטמאליגער ערשיינונג ארויספארן פראווען א שבת מחוץ לעיה"ק ירושלים אינאיינעם מיט די נגידי החסידות.

דאס קומט אין א צייט ווען די אימפעריע פון מוסדות בעלזא האט זיך דראסטיש צעוואקסן מיט טויזנטער תלמידים אין די תלמוד תורה און די בחורי חמד אין די פארצווייגטע נעץ פון סניפי הישיבות, און עס פעלט זיך דרינגנד אויס אויפצובויען פינף פרישע בנינים פאר די ישיבות, א מאסיווער פראיעקט וואס ציט אריין אין אסטראנאמישע סומעס פון צענדליגער מיליאנען.

צוליב דעם איז דער בעלזער רב שליט"א ארויס מגדרו און פאררופן א שבת מיוחד וכינוס התעוודות מיט די נגידי החסידות וואס וועלן האבן די זכי' מיטצולעבן א פריוואטן שבת מיט'ן רבי'ן כשהמלך בשדה.

דער היסטארישער שבת איז באשטימט געווארן אויף דעם קומענדיגן שבת פר' אחרי-קדושים, ח' אייר, אין א פראכטפולע האטעל-קאמפלעקס בהרי ירושלים, און וועט זיין געאייגנט אויסשליסליך פאר די קרואי מועד, די נגידים פון איבער די גארער וועלט וואס שליסן זיך אן מיט סכומים נכבדים פאר'ן פינף פאכיגן פראיעקט פון די נייע בניני הישיבות.