פרייד צווישן חסידי צאנז קלויזנבורג צום גמר המקח פון בנין אדיר לטובת בית חינוך לבנות צאנז קלויזענבורג אין מאנסי

מוצאי שבת פ' קרח • ב' תמוז תשפ"ה | בחצרות הקודש

חסידי צאנז קלויזנבורג האבן דעם ערב שבת אויפגענומען מיט פרייד די בשורה מרנינה איבער דעם איבערראשנדע גמר המקח וואס איז אונטערגענימען געווארן דורך ק"ק ומוסדות צאנז קלויזענבורג אין מאנסי אויף א פראכטפולער מאעסטעטישער בנין אדיר וואס מען האט מצליח געווען אפצוקויפן פארן סכום עצום פון אריבער פערצן מיליאן דאללער, וואו עס וועט אי"ה פלאצירט ווערן די בית חינוך לבנות צאנז קלויזנבורג אין מאנסי, וואו די תלמידות וועלן בעזהשי"ת ווייטער באקומען דעם ערליכן חינוך בדרך ישראל סבא תחת דגלו והדרכתו פונעם מנהיג העדה כ"ק אדמו"ר מצאנז קלויזנבורג שליט"א.

די יעצטיגער מקח קומט נאך  יארן פון זוכענישן, און חדשים פון באמיאונגען בעת  דער יעצטיגער בנין וואס דינט שוין יאהרן אלס לייכטורעם פאר חינוך הבנות, איז שוין געווארן שטארק אויסגעוואקסן, ובפרט די לעצטערע יארן, ווען דער געדרענג און דחקות איז געווען עד אין לשער.

דער נייע בנין וואס איז אפגעקויפט געווארן געפונט זיך אויף די העיוויאו גאס אין מאנסי און ענטהאלט פיר שטאק מיט איבער פערציג טויזענט סקווער פוס, צו דינען אלס הערליכער היים פאר די בית חינוך לבנות צאנז קלויזענבורג אין מאנסי.

לויט די לעגאלע פארשריפטן איז ערלויבט צוצובויען אויף דעם בנין נאך עטליכע שטאק פון צען טויזענט סקווער פוס א שטאק, אין וועלכע די הנהלת המוסדות פלאנט בעזרת השם אינעם עתיד צו בויען נאך שטאקן צו קענען אקאמאדירן דער שנעל-וואקסנדער צאל תלמידות בלי עין הרע.

אויפן אונטערשטן שטאק פונעם בנין איז דער פלאן אהערצושטעלן פרעכטיגע שמחה זאל'ן וועלכע וועט אריינברענגען טעגליכע פארדינסטן פאר די מוסדות, מיט נאך פילע פלענער וועלכע וועבן זיך אין די יעצטיגע טעג אינערהאלב די הנהלת המוסדות.

נאכ'ן שליסן דעם מקח זענען די עסקנים און חברי הנהלה ערשינען בקודש פנימה ביים רבי'ן שליט"א, איבערצוגיין די פרטים, זיי האבן באדאנקט דעם רבי'ן פארן באגלייטן דעם מקח אויף טריט און שריט און באזונדער פארן ארויסקומען - מיט עטליכע טעג פריער - קיין מאנסי וואו דער רבי איז געזעצן מיט די עסקנים און דורכגעטוהן די פלענער פון דער נאנט, און דערביי האט דער רבי שליט"א מאציל געווען מברכותיו הטהורים פאר די ווייטערדיגע הצלחה פון די הייליגע מוסדות.