בריך מתייך: גאב"ד מאקאווא נעמט אונטער ביקור מרומם קיין ניו יארק, נאכ'ן אפרעכטן שבת התעוררות אין לובלין פולין

מיטוואך פ' וארא • כ"ב טבת תשפ"ה | בחצרות הקודש

בילד קרעדיט: שוקי לרר

תלמידי וחסידי מאקאווא תושבי ניו יארק וועלן בהדרת כבוד ושמחה יתירה זוכה זיין מקבל צו זיין את פני הקודש פון מורם ורבם כ"ק גאב"ד מאקאווא שליט"א, וועלכער וועט דעם קומענדיגן וואך פרשת בא אנקומען קיין ניו יארק אויף א ביקור מרומם פון משך א וואך צייט.

דער מאקאווא רב שליט"א גרייט זיך ארויסצופארן אויף א מסע התעוררות צום תורה-אנגעזאפטער עיר מלאה חכמים וסופרים "לובלין" אין פוילן, און וועט אפרעכטן א שבת עילאה נעבן דעם היסטארישן בנין פון "ישיבת חכמי לובלין" אינאיינעם מיט די נגידים ותומכים וואס האבן די זכי' צו שטיין לימין קדשו פונעם רב און אים ארויסהעלפן מיט די מפעלי תורה וחסד בנשיאותו.

דער רב שליט"א וועט זיך ארויסלאזן קיין פוילן מארגן דאנערשטאג, און תיכף נאך שבת ממשיך זיין מיט די נסיעה קיין אמעריקע, וואס דער רב נעמט אונטער ספעציעל צו באשיינען די שמחת החתונה בבית מקורבו ומגדולי התומכים הרבני הנגיד ר' יעקב אבעלעס הי"ו, וואס קומט פאר די קומענדיגע וואך אין ניו יארק.

דורכאויס די וואך וועט זיין א געלעגנהייט ביים ציבור תלמידים וחסידים און כלל תושבי ניו יארק זיך צו ווארעמען לאורו און אריינגיין בקודש פנימה לעצה ולברכה, און מיטלעבן די געהויבענע זמנים בצל קדשו בזמן שהצדיק בעיר.

שב"ק פרשת בא וועט דער רב שליט"א אפרעכטן אויף א פריוואטן פארנעם אין שטאט מאנסי, און נאך שבת זיך אהיימקערן למעון קדשו אין ארץ ישראל.