ירושלים נתן קולה: אלפי בני ירושלים האבן אויסגעשריגן: "גיוס בני ישיבות, היה לא תהיה!"

זונטאג פ' ואתחנן • ט' אב תשפ"ה | בחצרות הקודש

בילדער קרעדיט: שלום קרויס

טויזנטער בני ירושלים החונים תחת דגל העדה החרדית האבן זיך דעם ליל שישי פארזאמלט בחוצות קריה על פני כיכר זופניק אויף א עצרת קינה וזעקה פארופן דורך די שרי התורה חברי ביה דינא רבה ארויסצוגעבן דעם זעקת קודש און קול תפילה ומחאה קעגן דעם שרעקליכן חוק הגיוס און גזירת שמד אויף בחורי ישראל היה לא תהיה.

בראש המשתתפים האבן זיך אנגעזעהן מרנן ורבנן שרי התורה חברי בית דין צדק העדה החרדית, און פילע אדמורי"ם ורבנים גדולי ומאורי הדור, דיינים און יושבים על מדין, ובראשם פאר הדור הגה"צ רבי יעקב מאיר שעכטער שליט"א, כ"ק האדמורי"ם מדושינסקיא, פינסק קארלין, משכנות הרועים, קהל חסידי ירושלים, קרעטשניף סיגעט, סקולען ירושלים, סטראפקוב, קאלאשין, הגה"צ רבי משה קרעמער שליט"א ממנהיגי ברסלב, הגאון רבי יצחק זאב סולובייציק ראש ישיבת בריסק, הגה"צ רבי משה טייטלבוים דומ"ץ סאטמאר ירושלים, הגה"צ רבי משה קאהן ראש ישיבת תולדות אהרן, און נאך.

די עצרת האט זיך אנגעהויבן מיט פרקי תהילים דורך הגה"ח ר' יעקב כהן שליט"א מיקירי קרתא דשופריא, און דערויף איז דער מעמד געעפנט געווארן דורכ'ן יושב ראש הר"ר הר"ר יצחק שלמה בלויא שליט"א ספרא דדיינא, וועלכער האט איבערגעגעבן דעם דעת תורה הבהירה פון די שרי התורה איבער די גזירה נוראה און די סכנה עצומה וואס הערשט אויפ'ן גאנצן יהדות ארץ ישראל. דערנאך האט דער יו"ר מכבד געווען הגאון הגדול ר' אברהם יצחק אולמאן שליט"א חבר הבד"ץ וועלכער האט בדברים כדרבונות ארויסגעברענגט דעם חובת השעה און פליכט וואס ליגט אויף אלעמען צו זיין גרייט אויף מסירת נפש ווען ס'האנדלט זיך פון א שעת שמד אויף אלע דרי ארה"ק.

דערנאך האט אויפגעטרעטן הגאון הגדול רבי יהושע ראזנבערגער שליט"א חבר הביד"ץ וגאב"ד קרית הרמ"א בית שמש וועלכער האט בקול חוצב ארויסגעברענגט דעם שעת שמד, ווען אין די צייט וואס פילע פרייע אידן גייען נישט אין מיליטער, זענען די רשעי הציונים לוחם דייקא אין די היימישע אידן וועלנדיג אונטערברענגען דאס יהדות הנאמנה.

א סקרוך פון יראת הכבוד איז דורך אין די ביינער הערנדיג די הייליגע שטימע פונעם פוסק הדור מרן הגאון האדיר רבי משה שטערנבוך שליט"א בעל תשובות והנהגות וואס האט משמיע געווען דברות קודש דורך א לייוו הוקאפ "ויחל משה את פני ה' אלקיו", אויסשרייענדיג מנהמת לבו הטהור קעגן די גזירת השלטון וואס ווילן ח"ו באצווינגען אלע בני הישיבות צו גיין דינען אינעם טריפה'נעם מיליטער, קלארשטעלנדיג אז מיר זענען גרייט גיין מיט מסירות נפש אן קיין פשרות, אויב מ'וועט דארפן גיין אין תפיסה וועלן אלע גיין און תפיסה, אויב מ'וועט דארפן אנטלויפן קיין חוץ לארץ וועט מען אנטלויפן, אבער אין מיליטער וועט מען נישט גיין, און מ'וועט נישט מוותר זיין אפילו אויף איין בחור.

דערנאך האט מען געהערט די פייערדיגע ווערטער פונעם מלהיב לבבות ישראל הגה"צ רבי צבי מאיר זילבערבערג שליט"א וואס האט אויסגעשריגן פון הארץ טיפעניש אז מ'דארף גיין במלחמה ובתפילה קעגן די ביטערע גזירה, און האט דערביי פארגעזאגט א קאפיטל תהילים פסוק בפסוק בקול חוצב. דאן האט הגה"צ המקובל רבי גמליאל ראבינאוויטש שליט"א מראשי ישיבת שער השמים אויפגעטרעטן מיט דברים חצובים, און דערנאך זיך אראפגעזעצט אויף דער ערד און אפגעראכטן תיקון חצות קלאגנדיג אויף די חורבן הבית וגלות השכינה און בנוסף אויף די ביטערע חורבנות בזמן הזה, עס איז געווען א מחזה הוד ווען די מאסן משתתפים ובראשם די חברי הבד"ץ האבן זיך אראפגעזעצט אויף די ערד, "ישבו לארץ ידמו זקני בת ציון, הורידו לארץ ראשן הורידי כנחל דמעה על שבר בת עמי"

צום שלוס האט דער פאר הדור הגה"צ רבי יעקב מאיר שעכטער שליט"א זיצנדיג אין קאר  פארגעזאגט פסוקי ייחוד און קבלת עול מלכות שמים מיט אן אויסטערלישע התעוררות וואס האט אפגעהילעכט בחוצות ירושלים פון רבבות מקדשי שם שמים.