שעות פון שמחה והודאה ביי חתונה הגדולה פון נכדת האד' מתולדות אברהם יצחק נאך שווערע מיטמאכעניש אין מצב בריאותו

זונטאג פ' וישלח • י' כסלו תשפ"ו | בחצרות הקודש

בילדער קרעדיט: א. אייזנבאך

מיט התרוממות הנפש וחדוות הלבבות איז אין דער שטאט ביתר אפגעראכטן געווארן די חתונה הגדולה פון אן אייניקל ביי כ"ק אדמו"ר מתולדות אברהם יצחק שליט"א, די כלה תחי' א טאכטער פון בנו חביבו הגה"צ רבי ישראל קאהן אבד"ק תולדות אברהם יצחק בארא פארק איידעם ביי הגה"צ רבי דוד שווימער דומ"ץ וויזניץ בית שמש, מיט די חתן א זון פון הרב נפתלי שטיין שליט"א, זון פון הגה"צ ר' דוד שלמה שטיין שליט"א ראה"כ ספינקא ואבד"ק פאלטישאן וויליאמסבורג, און איידעם ביי כ"ק אדמו"ר מקארלסבורג שליט"א פון וויליאמסבורג.

מיט באזונדערע רגשי הלב האבן חסידי תולדות אברהם יצחק מיטגעלעבט געהויבענע שעות פון הלל והודאה בצילא דמהימנותא פונעם געהויבענעם זיידן די רועה נאמן כ"ק אדמו"ר מתולדות אברהם יצחק שליט"א, אפגעבנדיג א שבח והודאה צום בורא עולם עד הנה עזרונו רחמיך אז מ'איז זוכה נאך אזא שווערע תקופה אז די רבי שליט"א איז מפאר בראש שמחתו ביי די חתונה פון אן אייניקל העכער אלע ערווארטונגען, און מיט א תפילה אויף ווייטער ואל תטשנו ה' אלוקינו לנצח.

נאכמיטאג איז די רבי שליט"א ערשינען אינעם גרויסן אודיטוריום זאל צום מעמד קבלת פנים און מיט זיינע שוואכע כוחות מיטגעהאלטן די ניגוני התעוררות און דביקות. מיט קריאת התנאים איז מכובד געווארן די פעטער הגה"צ רבי ישראל האגער שליט"א זון פון הגה"צ בעל אור שלום מוויזניץ זצ"ל, און עס האט אויפגעטרעטן מיט דברי חרוזין בדחנא דמלכא ר' פנחס גרינפעלד הי"ו מעורר צו זיין דעם חתן, און דערמאנען די אבות הקדושים וואס קומען אראפ צו די שמחה.

ביי די מעמד החופה איז מכובד געווארן מיט סידור קידושין די זיידע כ"ק אדמו"ר מקארלסבורג שליט"א, קריאת הכתובה די פעטער כ"ק אדמו"ר ממבקשי אמונה שליט"א, כ"ק אדמו"ר מתולדות אברהם יצחק שליט"א האט געזאגט די שבע ברכות, און נאכן חופה האט מען זיך ארויסגעלאזט אין א מחול לצדיקים.

עס האט נאכגעפאלגט די סעודת החתונה מיט די פייערדיגע ריקודין של שמחה, שעות נאכאנאנד האט מען זיך משמח געווען ביי די געהויבענע שמחה, אין די זעלבע צייט האט זיך די רבי שליט"א געפונען זיין דירה אין ביהמ"ד תולדות אברהם יצחק בשכינות פונעם זאל, ווי די רבי האט זיך אפגערוהט עטליכע שעה.

קרוב צו 11:00 אויפדערנאכט איז די רבי שליט"א ערשינען צו די שמחה. א רירנדע מאמענט איז געווען בעת די ריקודין ווען די רבי האט זיך באוויזן אין זאל, ווען מען האט געזונגען דעם פרייליכן ניגון "די רבי זאל דערלעבן אונז צו פירן אקעגן משיח צדקנו", וואו די רבי האט מיט א קענטיגע התרגשות אויפגעהויבן זיינע ביידע הענט כלפי מעלה און מעודד געווען די ריקודין עילאין. דערנאך האט דער מחותן הגה"צ אבד"ק תולדות אברהם יצחק בארא פארק אויפגעטרעטן מיט קארצע דברי שבח והודאה אז די טאטע דער רבי שליט"א באשיינט בראש השמחה, מיט א תפילה אויף ווייטער צו קענען לאנגע געזונטע יארן מיטהאלטן די שמחות ביי די אייניקלעך און אור אייניקלעך, און דער ציבור האט זיך ווייטער געהויבן מיט פרייליכע טענץ להודות ולהלל.

דערנאך האט די רבי שליט"א אין א זעלטענע שריט משמיע געווען רירנדע דברות קודש ארויסברענגענדיג זיינע הרגשים אז ער קען ב"ה מהנה זיין זיינע חשובע קינדער און זיך מיטפרייען ביי זייערע שמחות, די רבי האט דערמאנט די שווערע דורכגאנג אין געזונט, מיטן שווערן אינפעקציע וואס האט געליטן אויף די פיס, און ממליץ געווען דער פסוק אין תהילים השם נפשנו בחיים ולא נתן למוט רגלינו, די רבי האט זיך אויסגעדרוקט אז ער איז נאך אלס גאר אפגעשוואכט און ער קען נישט גענוג דאנקען, דעריבער מאכט ער דעם גאנצן עולם כל קהלא קדישא אלס א שליח צו דאנקען דעם בורא כל עולמים על כל הטוב והחסד. די רבי האט דערנאך מכבד געווען זיין זוהן דער מחותן פארצוזינגען כבודו מלא עולם חזן וקהל.

דורכאויס די שמחה האבן זיך אנגעזעהן די פעטערס און קרובי המשפחה האדמורי"ם ממעליץ, ראחוב, זידיטשוב בני ברק, מבקשי אמונה, נחלת אהרן, ספינקא בני ברק, ספינקא ירושלים, סערעדנא, ספינקא סאסרעגן, ספינקא סוליצא, ראש ישיבת תולדות אהרן און נאך.

בדחנא דמלכא הרה"ח ר' פנחס גרינפעלד הי"ו האט מיט גאר הארציגע דברי חרוזין אויפגערופן דעם געהויבענע זיידע כ"ק אדמו"ר מתולדות אברהם יצחק שליט"א צום מצוה טאנץ. די רבי האט געפראוועט די הייליגע עבודה פון מצוות הריקודין, זיצנדיגערהייט, ווען דער ציבור האט זיך געהויבן אין די לופטן מיט גרויס חיות און התלהבות, דערנאך איז די רבי געטאנצן מיט די חתן און באזונדער מיט די זיידעס און מחותנים, דערנאך א רינג מיט אלע קינדער און אייניקלעך בני משפחת המלוכה.

דערנאך האט מען פארגעזעצט מיט די ריקודין פון די זיידעס כ"ק אדמו"ר מקארלסבורג שליט"א, הגה"צ רבי דוד שווימער דומ"ץ וויזניץ בית שמש און הגה"צ רבי דוד שלמה שטיין אבד"ק פאלטישאן. דערנאך איז געטאנצן די אבי הכלה הגה"צ אבד"ק תולדות אברהם יצחק בארא פארק, וואו עס איז געשאפן געווארן א שיינעם ריקוד אינאיינעם מיט די פילע געסט חסידי תולדות אברהם יצחק פון אמעריקא וואס זענען געקומען צופארן צו די שמחה לכבודו פונעם חשובן מחותן דער רב הקהילה, און די רבי שליט"א האט פארלאזט דעם זאל, איידער מען האט ממשיך געווען די ריקודין פונעם אבי החתן און די חתן לפני הכלה.