גרויסער מעמד תפילת רבים וועט פארקומען דעם ליל שישי הבעל"ט ביים כותל המערבי לרפואת האד' מוויזניץ
- לפני 17 דקות
- זמן קריאה 1 דקות
פרייטאג פ' פינחס • י"ח תמוז תשפ"ו | בחצרות הקודש
בחצר הקודש וויזניץ הערשט א גרויסע התעוררות זיך גרייטנדיג צו א געמיינזאמע מעמד תפילת רבים ביים כותל המערבי, לרפואתו השלימה פונעם מנהיג העדה הקדושה מרן אדמו"ר מוויזניץ שליט"א מרן ישראל בן לאה אסתר, וואס איז פאררופן געווארן דורך דעם רבינס קינדער הרבנים הגאונים הצדיקים שליט"א פאר כל קהלא קדישא, עדת חסידי וויזניץ זקנים עם נערים.
די תפילת רבים וועט פארקומען קומענדיגן ליל שישי פרשת מטות־מסעי, אום 10:30 ביינאכט, ביים שריד בית מקדשנו – הכותל המערבי, שטייענדיג אין די ימים המסוגלים פון בין המצרים, "כל רודפיה השיגוה בין המצרים".
אין דעם הארציגן בריוו אונטערגעשריבן דורך די ברידער הגה"צ אבד"ק קרית וויזניץ שליט"א, הרה"צ רבי יצחק ישעי' האגער שליט"א און הרה"צ רבי יעקב מרדכי האגער שליט"א אבד"ק וויזניץ אלעד שרייבן זיי, אז ווען מען שטייט שוין נענטער ווי ווייטער צו די ימי הרחמים והרצון, ווענדט זיך דאס הארץ פון יעדן חסיד מיט א תפילה ובקשה, אז דער רבי שליט"א, "אילנא דחיי המרווה צמאוננו כמים", זאל בקרוב צוריקקערן צו זיין פולשטענדיגער געזונט כימי קדם, און זוכה זיין אפצורעכטן די ימים טובים בתוך קהל ועדה, בבריות גופא ונהורא מעליא.
זיי רופן אלע חסידים – אברכים, בעלי בתים און די תלמידי הישיבות – זיך צו פאראייניגן ביים מעמד תפילת רבים אויפ'ן הייליגן ארט "שלא זזה ממנו שכינה", מיטן האפענונג שיתקבלו תפלותינו לרחמים ולרצון, דער רבי שליט"א זאל האבן א גאנצע רפואה, און קענען ווייטער משפיע זיין פארן גאנצן כלל ישראל בשלימות הבריאות.
