יומא טבא לרבנן: מעמד כבוד התורה און חלוקת פרסים אין ישיבה גדולה תולדות אהרן אין אלעד

מיטוואך פ' תולדות • כ"ח חשון תשפ"ו | בחצרות הקודש

בילדער קרעדיט: שוקי לרר

א הערליכע מעמד כבוד התורה איז נעכטן אפגעראכטן געווארן אין די ישיבת גדולה תולדות אהרן אין אלעד, וואו די הונדערטער בחורי חמד תלמידי הישיבה האבן געפייערט דעם יומא טבא לרבנן, לרגל סיום מסכתות קידושין און בבא מציעא וואס די בחורים האבן געלערנט און געחזרט דורכאויס די לעצטע צוויי יאר, אינאיינעם מיטן מעמד חלוקת תעודות פאר די בחורים מצטיינים. די מעמד איז פארגעקומען אינעם גרויסן היכל אין די קרית הישיבות אין שטאט אלעד, אין שפיץ פון כ"ק אדמו"ר מתולדות אהרן שליט"א, וועלכער האט זיך אויפגעהאלטן די לעצטע וואך אינעם קרית הישיבה אויף אפרוה.

די מעמד איז באגלייט געווארן מיט רייכע נגינה אנגעפירט דורך די משוררים בחצר הקודש תולדות אהרן, און עס זענען געהערט געווארן א רייע דרשות דורך די רבני הישיבה ומגידים שונים. בהדרת כבוד האט מען ענטפאנגען דער מרא דאתרא הגאון רבי שלמה זלמן גראסמאן שליט"א דער רב פון שטאט אלעד וועלכער האט באשיינט די מעמד בראש המסובים. דערנאך האט מען אויפגערופן עטליכע בחורים מצוינים מסיים צו זיין די מסכתות און די רבי שליט"א האט געזאגט דעם הדרן, און קדיש. עס האט נאכגעפאלגט מיט ריקודין נלהבין לכבוד שמחת התורה וואס האט אנגעהאלטן א לענגערע וויילע.

מען האט דאן געזינגען א ניגון הכנה און דערנאך געהערט די לענגערע דברות קודש, פונעם נשיא הישיבה די רבי שליט"א, מתובל מיט דברי חיזוק והדרכה ווייטער מוסיף צו זיין בתורה עבודה ומדות טובות און אויסנוצן די צייט בפרט די לאנגע ווינטער נעכט, כראוי.