צענטראלע שבע ברכות בשמחת בית בעלזא באשיינט דורך גדולי ישראל פון אלע שיכטן און קרייזן

דאנערשטאג פ' קרח • ל' סיון תשפ"ה | בחצרות הקודש

בחדווה עילאה האבן זיך טויזנטער בעלזער חסידים מיטגעפריידט ביי די שבע ברכות רבתי לכבוד די חתונה הגדולה אין די בעלזער הויף, די שמחה איז פארגעקומען אינעם גרויסן שטוב אין קרית בעלזא ירושלים, וואו מען האט זיך משמח געווען בשירות ותשבחות ביז אין די שפעטע נאכט שעות לכבוד די שמחה הרוממה, וחסידים ברינה יגולו אויף גאר א געהויבענעם עקסטאזליכע שטימונג.

דער אויבן אן איז באשיינט געווארן דורך מרנן ורבנן גדולי ישראל, אדמורי"ם, רבנים, וראשי ישיבות מכל פינות ומחנות וועלכע זענען געקומען זיך מיטפרייען בשמחתו הגדולה פונעם רועה נאמן כ''ק האדמו''ר מבעלזא שליט''א.

ובראשם האבן זיך אנגעזעהן האדמורי"ם מראחמיסטריווקא, ביאלא, סאדיגורא, פינסק קארלין, סקולען ירושלים, שומרי אמונים, שומרי אמונים ירושלים, סאדיגורא ירושלים, סטריקוב ירושלים, אונגוואר, סטראפקוב, סאווראן ירושלים, לעלוב ירושלים, לינסק, מישקאלץ, דינוב ביתר, לייפניק, ליטשיק, מעזיבוז.

.

הגאון רבי ראובן אלבז ראש ישיבת אור החיים, דער ראשון לציון הגאון רבי שלמה משה עמאר, הגה"צ רבי מנחם ארנסטר ראש ישיבת וויזניץ, ראש ישיבת טשעבין, ראש ישיבת ערלוי, גאב"ד זוועהיל, אב"ד מחשבת הלוי, הגאון רבי שלמה קאהן גאב"ד מעלבארן אויסטראליע, הרב מאיר רובינשטיין די מעיאר פון ביתר און נאך פילע עסקנים ואישי ציבור. 

אנהייב פון די שמחה האבן עטליכע חסידים געמאכט א סיום אויף מסכת שבועות אין די ראמען פון דף היומי דערביי משלב צו זיין שמחת חתן מיט שמחת התורה.

במשך די שמחה האט דער חזן ר' ישראל אדלער מהנה געוועהן בפרקי חזנות, און הגאון רבי יהושע פינק דומ"ץ בעלזא בני ברק האט אויפגעטרעטן מיט דברי בדחנות, לכבוד שמחת חתן וכלה, ווי ער האט מיט זיין זיסע שפראך משמח געווען במילי דבדיחותא ארום די יעצטיגע מצב המלחמה מיט איראן, און מסיים געווען מיט פילע ברכות לאריכות ימיו ושנותיו בטוב ובנעימים פונעם רב שליט"א.

מיטן בענטשן האט דער רב שליט"א מכבד געווען גיסו הגה"צ ראש ישיבת וויזניץ שליט"א, און מיט די שבע ברכות זענען נתכבד געווארן כ"ק אדמו"ר מסקולען ירושלים שליט"א, הגאון רבי שלמה קאהן גאב"ד מעלבארן, הרה"צ רבי ישראל האגער בן האדמו"ר מוויזניץ בארא פארק, הרב ישראל ארנסטר זון פון הגה"צ ראש ישיבת וויזניץ, ברכה אחריתא כ"ק אדמו"ר מראחמיסטריווקא שליט"א.

נאכן בענטשן האט מען זיך ארויסגעלאזט אין א ריקוד נלהב, וואס האט געשאפן א זעלטענעם מחזה הוד און האט אנגעהאלטן א לענגערע וויילע קרוב צו א שעה צייט, בעת די רב שליט"א איז איינגעהילט אין א זעלטענעם התלהבות דקדושה ושמחה עצומה, עס איז שוין געווען ארום איינס אזייגער אויפדערנאכט ווען דער רב האט פארלאזט דעם גרויסן שטוב און דער מחותן הרה"צ רבי אהרן מרדכי שליט"א איז פארבליבן אינעם היכל ווען די טויזנטער חסידים האבן זיך געשלענגערט אין די רייע צו וואונטשן מזל טוב פארן געהויבענעם בעל שמחה.