מעמד הנחת אבן הפינה פאר נייעם ביהמ"ד "פני מנחם" אין רמה ד' בית שמש בראשות הגאון ר' שאול אלתר שליט"א

דינסטאג פ' ואתחנן • י''א אב תשפ"ה | בחצרות הקודש

מיט גרויס התרגשות איז געלייגט געווארן די אבן הפינה פארן פינת יקרת, דער נייער ביהמ"ד דקהל פני מנחם אין רמה ד' בית שמש בנשיאותו פון ראש הישיבה הגאון הגדול רבי שאול אלתר שליט"א. דער ביהמ"ד איז געווידמעט לשמו ולזכרו פון הרה"ח ר' יעקב מנדלזוהן ע"ה ממייסדי ונכבדי ק"ק פני מנחם.

דער מעמד איז פארגעקומען תחת כיפת השמים אויפן שטח הבני' פונעם נייעם ביהמ"ד אין הארץ פון די בליענדע רמה ד' געגענט, וואו עס האבן באשיינט דעם פני המזרח דער ראש הישיבה שליט"א נשיא הקהילה ואחיו הרבנים הגאונים הצדיקים קינדער פון הרה"ק בעל פני מנחם מגור זצוק"ל, בנוסף האבן זיך אנגעזעהן פילע רבנים פון שטאט און דער אורח הכבוד פון אמעריקא הגה"צ אבד"ק ראסלאוויץ שליט"א.

הרה"ג רבי ישראל מרדכי אלתר שליט"א, מראשי ישיבת פני מנחם, האט געעפנט דעם מעמד מיט פאסיגע דברי פתיחה און דערנאך איז געהערט געווארן א רייע דרשות דורך הרה"ג ר' בצלאל ווקסלשטיין שליט"א רב קהילת פני מנחם, הגאון רבי דניאל חיים אלתר ראש ישיבה קטנה פני מנחם, הרה"ג רבי אברהם מרדכי אלתר שליט"א, און דער בונה ומקים הביהמ"ד הנגיד ר' פינחס ירט שליט"א.

נאך די דברי תורה וברכה דורכן אורח הכבוד הגה"צ אבד"ק ראסלאוויץ שליט"א האט מען געהערט דעם משא המעמד מפום ממלל רברבן דער ראש הישיבה שליט"א וואס האט בראשית דבריו באטאנט אז הגם מיר געפינען זיך אינעם תקופה פון די דריי וואכן ווען מען איז ממעט בשמחה, איז אבער אן אויסנאם די דאזיגע מעמד אבן הפינה פאר א בנין וואס איז געווידמעט פאר תורה, עבודה, און גמילות חסדים, וואס איז אן אמת׳ע אתחלתא דגאולה.

נאכן דרוש האט דער ראש הישיבה ווארעם אנגעוואונטשן די נדיבי לב וועלכע האבן זיך אנגערופן מיט סכומים אדירים לטובת דעם בנין ובראשם הנגיד ר' פינחס ירט הי"ו.

צום שלוס פונעם מעמד האט הרה"צ רבי יעקב מאיר אלתר שליט"א זוהן פונעם פני מנחם זצוק"ל, פארגעליינט דעם מגילת היסוד און דאן איז אין א שמחה'דיגע אטמאספער געלייגט געווארן דער אבן הפינה פאר דעם בית גדול וקדוש לתורה ותפילה.