האד' מגור באשיינט זעלטענע מעמד "בחינה רבתי" פאר לומדי כולל גור אין פתח תקוה אין שטוב פונעם משב"ק

דאנערשטאג פ' פקודי • כ''ו אדר תשפ"ה | בחצרות הקודש

די וואך דינסטאג איז כ"ק אדמו"ר מגור שליט"א אנגעקומען אין שטוב פונעם משמש בקודש ויד ימינו הרה"ח ר' לייבל פיזנצבסקי הי"ו אין מתחם שנעלער, וואו עס איז אפגעהאלטן געווארן א זעלטענע מעמד "בחינה רבתי", פאר די רבני ולומדי כולל 'מנחת שלמה' דחסידי גור אין פתח תקווה, וואס שטייט בראשות פונעם ראש הכולל הרה"ג אברהם העניך זילבערשטיין שליט"א, חדב"ן כ"ק אדמו"ר מגור שליט"א, וואס האבן זיך פארהערט אויף הונדערטער בלעטער גמרא בעל פה, אונטער די ראמען פון די בארימטע "מזומנים" תורה-רעוואלוציע בהתייסדות ונשיאות דער גרויסער מנהיג העדה כ"ק אדמו"ר מגור שליט"א.

דער באקאנטער בוחן הרה"ג ר' אברהם ישעי' שפירא שליט"א פון בני ברק, האט פארגעלייגט די שאלות און די יונגעלייט האבן געענטפערט מיט א שטוינענדע חריפות ובקיאות. נאך א פולע שעה של קורת רוח האט מען געהערט דרשות פון די ראשי כולל און דער פטרון הכולל הנגיד ר' שמואל ברוך מנדרזיצקי הי"ו האט געמאכט א סיום מסכתא. צום שלוס פונעם מעמד האט דער רבי שליט"א מאציל געוועהן ברכת קדשו לרוב פאר די לומדי הכולל צו קענען ווייטער ממשיך זיין בעסק התורה ביז'ן ענדיגן כל הש"ס כולה, און באזונדער געוואונטשן די נגידים וואס האבן זיך משתתף געוועהן ביים מעמד ובראשם הנגיד ר' שלמה ווערדיגער הי"ו יושב ראש אגודת ישראל ד'אמעריקא.