כשהמלך בשדה: געהויבענער שבת בצל האד' מצאנז קלויזנבורג אין מחנות הקיץ אין וואודבורן נאך זעקס יאר צייט אפשניט

מאנטאג פ' ראה • כ''ד אב תשפ"ה | בחצרות הקודש

א לעכטיגער שבת איז פאריבער אין די מחנות הקיץ צאנז קלויזענבורג אין וואודבורן במחיצת קדשו פון כ"ק אדמו"ר מצאנז קלויזענבורג שליט"א וועלכע איז ארויסגעקומען פראווענען א שבת אינעם קעמפ נאך א צייט אפשניט פון זעקס יאהר וואס דער רבי איז נישט געוועהן אויף א שבת צווישן די תושבי המחנה, און איבערהויפט די בחורים תלמידי הישיבה הק' און תלמידי ישיבה לצעירים אין בארא פארק וואס וויילן אין די מחנות הקיץ דורכאויס די זומער וואכן.

כהכנה דרבה צום געהויבענעם שבת איז ליל שישי אפגעהאלטן געווארן א ספעציעלע חבורה בראשות בנש"ק הרה"ג ר' טובי' ליבערמאן שליט''א מרבני ק"ק צאנז קלויזנבורג אין ירושלים, איידעם פון הגה"צ גאב"ד קרית צאנז ירושלים שליט"א. ערב שבת קודש נאך תפילת שחרית כחצות היום איז די רבי שליט"א ארויסגעפארן צום מחנות הקיץ וואו עס האבן אפגעווארט בשערי המחנה די תלמידי הישיבות און תושבי המחנה. באלד ביים אנקומען האט די רבי געהייסן דער דיין הרה"ג ר' אהרן לייב לעווי שליט"א צו מאכן דעם עירוב און זיכוי הפת.

דער בית המדרש בית יצחק שע"י ביתו נאווה קודש פונעם רבי'ן אין די מחנות הקיץ איז הערליך אויסגערישט געווארן צו קענען אקאמאדירן דעם ציבור ביי די געהויבענע תפילות במחיצת הקודש. פארן זמן איז די רבי אריינגעקומען צו מנחה און קבלת שבת, נאכן דאווענען איז די ציבור דורך וואונטשן א גוט שבת און שלום נעמען.

בשעה 12:30 איז דער רבי ערשינען צום עריכת שולחן הטהור אנגעהויבן פון כל מקדש, דער טיש ליל שבת קודש האט זיך פארצויגן פאר שעות רצופות, מיט דברות קודש, און זמירות ותשבחות. מיט די זמירות זענען נתכבד געווארן האדמו"ר מאלעסק לינדען, הרה"ג ר' דוד גראס שליט"א מרבני הקהילה, און דער דיין המחנה הרה"ג ר' אהרן לייב לעווי שליט"א.

די רבי שליט''א האט כמידי שבת בשבתו מאריך געווען בדברי דרוש פלפול ואגדה, און מכבד געווען מיטן בענטשן דער פלאמעניק הרה"ג ר' טוביה ליברמאן שליט"א מרבני ק"ק צאנז קלויזנבורג אין ירושלים, ארום דריי דרייסיג האט מען אהיימבאגלייט דעם רבי'ן צו די אכסניא.

כחצות היום איז די רבי אריינגעקומען צום דאווענען, ביים ליינען איז דער רבי מכובד געווארן מיט הוצאה והכנסה און עולה געווען שישי די עליה פון עשרת הדברות. און נאכן עולה זיין האט די רבי געמאכט א מי שברך פאר די דיין המחנה, און פאר העסקן הרב זלמן לייב ווידער הי"ו פון בני ברק מראשי העסקנים לטובת די אויפבוי פון די בניני המוסדות אין ארץ ישראל, און א באזונדערע מי שברך פאר אלע בחורי הישיבות.

שבת נאכמיטאג נאך מנחה האט נאכגעפאלגט די דערהויבענע סעודת רעוא דרעוין ברשפי אש, צום ערשט האט די רבי געטיילט פלאמען פאר די קרוב צו 250 קינדער פון מחנה בני צאנז, די רבי האט געזאגט תורה פאר קרוב צו אנדערטהאלבן שעה, ווי עס האבן מיטגעהאלטן א גרויסע ציבור פון די ארומיגע קאנטריס וואס זענען געקומען צופארן נאכן זמן מוצאי שבת, מען האט פארענדיגט שלש סעודות קרוב צו חצות הלילה, און שפעטער פארן עלות השחר איז די רבי אריינגעקומען צו מעריב און געמאכט הבדלה ברוב עם. נאך הבדלה איז די ציבור דורך ביים רבי'ן וואונטשן א גוטע וואך, און זיך צעשפרייט מיט געפילן פון התרוממות הנפש נאכ'ן מיטלעבן אזעלכע דערהויבענע שעות נשגבות פון נועם השבת במחיצת הקודש.

דער רבי שליט"א וועט פארבלייבן אין קעמפ אויף די קומענדיגע וואכן, זייענדיג א געלעגנהייט פאר די תושבי המחנה און תלמידי המוסדות זיך מסתופף צו זיין בצל קדשו כשהמלך בשדה.