איש על העדה: האד' מטאהש מכתיר בנו חביבו הגה"צ ר' חיים יחיאל אלתר סג"ל שליט"א אלס רב הקהלה אין מאנסי

דינסטאג פ' ויגש • ג' טבת תשפ"ו | בחצרות הקודש

חסידי טאהש תושבי מאנסי וואונטשן זיך די יעצטיגע טעג מזל טוב לרגל דאס התמנות פון הגה"צ רבי חיים יחיאל אלתר סג"ל לאווי שליט"א בנו חביבו פון כ"ק אדמו"ר מטאהש שליט"א, אלס רב הקהלה אין שטאט מאנסי.

דער נייער רב שליט"א איז שוין רבות בשנים מפאר כבוד און מרביץ תורה ויראה אינערהאלב די טאהש'ע קהלה אין מאנסי, זייענדיג מתושבי המקום, אלס איידעם פון הגה"צ ר' סיני וואגשאהל שליט"א מלאנצוהט מאנסי, און במשך די אלע יארן איז מען נהנה מבאר תורתו און זיין געהויבענע השפעה אינעם טאהש'ער ביהמ"ד זכרון אהל אלימלך.

ובפרט איז דער נייער רב שליט"א שטארק אינסטרומענטאל די לעצטע פאר יאר להרבות פעלים לתורה וחינוך, מיט'ן שטיין צוהילף אין שפיץ פון די פתיחת שערי המוסדות טאהש אין ניו יארק, און די נייע אויסגערופענע ישיבה גדולה וקטנה תפארת משולם פייש אין ניו יארק, וואו ער איז זעלסט א מרביץ תורה לשם ולתפארת, און אצינד איז געקומען די שעה טובה ווען מר אביו כ"ק אדמו"ר מטאהש שליט"א האט אים ממנה געווען לעמוד בראש העדה און שטיין בראש הקהלה והמוסדות אין שטאט מאנסי.

אין א מכתב קודש וואס דער רבי שליט"א האט געשריבן לכבוד די מלוה מלכה און מעמד התחדשות פונעם ביהמ"ד זכרון אהל אלימלך טאהש אין מאנסי, טוט דער רבי שליט"א אפיציעל באטיטלען בנו חביבו אלס "רב קהלתינו הק' מאנסי", אויסרופנדיג א שמחה עצומה ביים גאנצן ציבור חסידי טאהש תושבי העיר.