דראסטישע שינויים בחצר הקדוש בעלזא לקראת ראש השנה; באזונדער מנין וועט פארקומען אין גרויסן שטוב

דאנערשטאג פ' ראה • ד' אלול תשפ"ה | בחצרות הקודש

אין חצר הקודש בעלזא איז אין די יעצטיגע טעג געמאלדן געווארן איבער א צאל דראסטישע שינויים לקראת דעם קומענדיגן ראש השנה הבעל"ט, פאר די אלע טויזענטער חסידים בארץ ובגולה וועלכע קומען זיך מסתופף זיין בצל הקודש פון כ"ק אדמו"ר מבעלזא שליט"א אין קרית בעלזא - ירושלים.

דאס קומט נאך א אסיפה נחוצה וואס איז אפגעהאלטן געווארן בביתו נאוה קודש פון כ"ק אדמו"ר מבעלזא שליט"א, אינאיינעם מיט הרה"צ ר' אהרן מרדכי שליט"א און הרב ירמי' דאמען שליט"א העומד על הפקודים אין ביהמ"ד הגדול, וואו מען האט אינאיינעם אויסגעשמועסט מיטן רב שליט"א די פלענער אויף היי יאר ראש השנה. הרב ירמי' דאמען האט ארויסגעברענגט היות אויף ראש השנה איז דער גרעסטע צוזאמפאר דורכאויס דעם יאהר אין בעלזא, און דער בית המדרש הגדול קען נישט דערהייבן אזא ציבור עצום, עס איז אויסגעוואקסן פון אלע זייטן, און אין די לעצטערע פאר יארן האט געהערשט גאר א גרויס געדרענג ביי די תפילות, און דערביי פארגעלייגט עטליכע פארשידענע פארשלאגן בכדי צו לינדערן די מצב. דער רבי שליט"א האט אויסגעהערט אלע פלענער בכובד ראש, און אריינגעטראכט אין א יעדע אפציע באזונדער.

די אסיפה געשלאסן געווארן מיט א צאל דראסטישע שינויים לקראת ראש השנה הבעל"ט, בראש וראשון וועט היי יאר צום ערשטן מאל אין היסטאריע פארקומען א באזונדערע מנין אינעם גרויסן שטוב וואס קען ארייננעמען עטליכע טויזנט חסידים, מיט באזונדערע בעלי תפלות, כדי צו לינדערן די שווערע געדרענג אין היכל ביהמ"ד הגדול.

באזונדער וועט היי יאר צום ערשטן מאל זיין צוגעשטעלט אין אלע בעלזער שטיבלעך אין אלע שטעט איבער גאנץ ארץ ישראל מנינים אום ראש השנה, כדי די חסידים וואס קענען נישט אנקומען קיין ירושלים זאלן קענען דאוונען אין זיין קביעות'דיגע שטיבל מיטן בעלזער נוסח וואו מען איז געוואוינט.

די עסקנים אפעלירן צום ציבור, אז ווער עס קען, זאל קומען אויף ראש השנה אליינס אן די פרויען, היות וואס אין ביהמ"ד וועט היי יאהר זיין צוגעשטעלט פיל ווייניגער פרויען זיצן, נאכדעם וואס איין חלק פון די עזרת נשים גאלעריע וועט זיין געווידמעט פאר די מענער, כדי צו קענען נאכקומען דעם גרויסן פארלאנג פון זיצן.

די בחורי חמד וועלן אזוי ווי אלע יארן שטיין ביי די דורכגענג צווישן די זיצן, סיי אין היכל ביהמ"ד, סיי אויף די גאלעריען. אזוי אויך היי יאר וועלן די עסקנים פון די 'וועדת הדירות' נישט צושטעלן דירות פאר משפחות, צוליב דעם וואס מען קען פשוט נישט ערהאלטן אזא מספר פון מענטשן, כל שכן גאנצע משפחות.

די געהויבענע טישן וועלן פארקומען אזוי ווי היי יאהר שבועות, אינעם חצר הגדולה פארנט פון ביהמ"ד הגדול, ווי עס וועלן אויפגעשטעלט ווערן הויכשטאקיגע פארענטשעס פון 15 שטאק, ארום דעם גאנצן שטח החצר.