כִּשְׂרֵפַת בֵּית אֱלֹקֵינוּ • תשעה באב בחצר הקודש בעלזא

מאנטאג פ' ואתחנן • י' אב תשפ"ה | בחצרות הקודש

בילדער קרעדיט: אנשיל בעק וא.מ.ש

אלפי חסידי בעלזא האבן מיטגעהאלטן דעם יום המר והנמהר תשעה באב בצל הקודש פון כ"ק אדמו"ר מבעלזא שליט"א אינעם קריה נאמנה, קרית בעלזא ירושלים.

ליל תשעה באב נאך אמירת "איכה" האט הגאון רבי פנחס פרידמאן ראש הכוללים דבעלזא וראש ישיבת מבקשי השם, געהאלטן הספד אינעם גרויסן היכל, בנוכחת כ"ק אדמו"ר מבעלזא שליט"א, לזכרו פון הגאון החסיד ר' שלום ישראל דירנפעלד ז"ל ראש ישיבת תורה ואמונה פון די יושבים ראשונה במלכות, שטייענדיג נאך אין די ימי השבעה נאך זיין פטירה, ווען דער וואונד איז נאך פריש.

היי יאהר האט זיך טאקע געשפירט דעם חלל ביי קינות תשעה באב, ווען מען האט ליידער נישט געהערט דעם קול רגש פונעם קביעות'דיגער שליח ציבור ר' שלום ישראל דירנפעלד ז"ל וואס האט געהאט די לאנגיעריגע חזקה פארצוזאגן די קינות, זיין ארט האט איבערגענומען דער בעל תפילה הרה"ח ר' אברהם ישעי' דאמען הי"ו.

מוצאי תשעה באב נאך מעריב האט הרה"צ ר' שלום רוקח שליט"א נכדו הגדול פונעם רב שליט"א געמאכט הבדלה ברוב עם, און דער רב שליט"א האט דערנאך אויסגעפאסט בביתו נאווה קודש. שפעטער באנאכט איז דער רב שליט"א אריינגעקומען צום לעקח און בראנפין אינעם גרויסן שטוב וואס איז געוועהן פיל געפאקט עד אפס מקום. מען האט געזינגען ניגוני גלות וציפייה לגאולה און באזונדער האט די קאפיעלע פארגעזינגען פארשידענע פיוטים פון די קינות תשעה באב ביי וועלכן דער רב שליט"א האט זיך צעוויינט עטליכע מאל בדמעות שליש.

נאכן לעקח און בראנפין זענען די הונדערטער תלמידי ישיבות גדולות ארויסגעפארן צום שריד בית מקדשינו דער כותל המערבי כמידי שנה בשנה, וואו מען האט פארברענגט ביז שפעט אין די נאכט אריין זינגענדיג ניגוני גלות וגאולה מיט געגועין און כיסופין צום בנין בית מקדשינו שיבנה במהרה בימינו.