הערליכער מעמד חלוקת פרסים פאר תלמידי ישיבה קטנה צאנז קלויזענבורג אין בארא פארק

דאנשטאג פ' תצוה • ו' אדר תשפ"ה | בחצרות הקודש

פארלאפענע וואך האט כ"ק אדמו"ר מצאנז קלויזענבורג שליט"א באשיינט די מעמד כבוד התורה 'אשריכם תלמידי חכמים' פאר די בחורי חמד תלמידי ישיבה לצעירים צאנז קלויזענבורג אין בארא פארק וואס האבן זיך פארהערט אויף די לימודים פארגאנגענעם יאהר בין כותלי הישיבה, כרצון קדשו פונעם רבי'ן שליט"א.

די מעמד איז פארגעקומען אין די זאל בית אסתר אין בארא פארק מיט די השתתפות פון די בחורים און די עלטערן, ווען צום הויכפונקט פון די מעמד האט מען געהערט דברי אלוקים חיים פונעם רבי'ן שליט"א פאר קרוב צו אנדערטהאלבן שעה מיט דברי הדרכה ויסודות איתנים צו שטייגן במעלות רמות באגלייט מיט דברי הכנה צו די ימי הפורים הממשמשים ובאים, וואו דער רבי האט געשילדערט א מעין דמעין ויאזוי עס האט אויסגעזעהן די ימי הפורים ביי אביו הרה"ק בעל שפע חיים מצאנז קלויזנבורג זי"ע.

נאך די דברות קודש האט די רבי פארטיילט די ספר הק' 'דרך פקודיך' כאות הוקרה והערכה פאר אלע בחורים וואס האבן זיך מצטיין געווען בלימוד שעות ברציפות אין לויף פון די ימי השובבי"ם, צום שלוס פונעם מעמד האט די רבי אפגעראכטן א שולחן לחיים און אלע בחורים זענען דורך אל מול פני הקודש.