top of page
WhatsApp_Image_2024-02-28_at_5.29.13_PM__1_.jpeg

מעמד "הנחת אבן הפינה" פאר נייעם צוגעבויעטן בנין צו ישיבה תפארת משולם פייש ד'טאהש‎ אין טשעסטער

פרייטאג פ' כי תבוא - ט"ו אלול תשפ"ג | בחצרות הקודש

קרעדיט קרית יואל היימשטאט


פארגאנגענעם וואך בעת דעם קורצן באזוך פון כ"ק אדמו"ר מטאהש שליט"א אין ניו יארק, איז די רבי ערשינען בהיכל ישיבה תפארת משולם פייש ד'טאהש אין קרית יואל, צום מעמד "הנחת אבן הפינה ויציקת היסודות" פאר דעם נייעם צוגעבויעטן חלק וועלכע ווערט אצינד צוגעבויעט צום עקזיסטירענדן בנין הישיבה, כדי צו פארגרעסערן דעם יעצטיגן בנין מפואר, און ווי אויך צוצובויען א מקוה מפוארה, און דארמעטארי שטובער פאר די בחורי הישיבה וועלכע קומען מחוץ לעיר.


דער נייער בנין מפואר וועלכע ווערט יעצט אויפגעבויעט מיטן פולסטן טעמפא, איז אונטערגענומען געווארן דורך די הנהלת הישיבה בהתייעצות ובברכת קדשו פון טאהשער רבי שליט"א, נאכדעם וואס די ישיבה האט זיך אין איר קורצע צייט פון די התייסדות הישיבה שטארק קונה שם געווען אלץ א אייגנארטיגע מקום תורה פאר חשובע בחורים, און די ישיבה שם'ט מיט איר געוואלדיגע הצלחה בסייעתא דשמיא, כדי צו קענען אקאמאדירן דעם ריבוי התלמידים בע"ה פארן קומענדיגן יאהר מיט הרחבת הדעת.


תיכף ביים אנקומען אין ישיבה האט דער רבי שליט"א זיך ארומגעקוקט ווי די בחורי הישיבה זענען געזיצן און געלערנט אין היכל הישיבה מיט א געוואלדיגע התמדה, דער קול תורה האט געקלינגען, און דער רבי האט געשעפט מלא חפניים נחת דקדושה. דער רבי האט געוואלדיג הנאה געהאט ווי די בחורים חזר'ן יעצט איבער די לימודים פון א גאנץ יאהר און גרייטן זיך צו פארהערן גאנץ מסכת גיטין, און הלכות תפילה.


דער טאהשער רבי האט געדאווענט תפילת מנחה אינאיינעם מיט די בחורים. נאך מנחה איז דער רבי אינאיינעם מיטן מנהל ומגידי שיעורים שליט"א און תלמידי הישיבה ארויס צום חצר הישיבה צום מעמד הנחת אבן הפינה.


מען האט געזאגט אינאיינעם עטליכע מזמורי תהלים, קאפיטל כ"ז, כ"ד, קכ"ג און ל', נאך תהלים האט דער רבי אריינגעלייגט מטבעות קודש וועלכע זענען געבענטשט געווארן פון אביו הקדוש זי"ע, זייענדיג מתפלל להצלחת הישיבה הקדושה.


דער טאהשער רבי האט מכבד געווען דעם מנהל הרב הגאון רבי מרדכי בעריש מערמעלשטיין שליט"א, און דער משגיח ושו"מ הרב הגאון רבי מנחם מענדל סג"ל גאלדשטיין שליט"א, און די רמ"י הישיבה שליט"א אריינצולייגן די ק"ס מטבעות, און דערנאך האבן די בחורי חמד תלמידי הישיבה געהאט די געלעגנהייט אריינצולייגן פון די מטבעות. דער רבי האט געגאסן די צעמענט פאר די יסודות הבנין והמקוה, ווען בשעת'ן גיסן האט מען געזינגען ניגונים לכבוד המאורע.


דערנאך איז מען אריין אינעם היכל הישיבה, דער טאהשער רבי האט געמאכט א לחיים, אויפטרעטנדיג מיט ווארימע דברי הדרכה וברכה פאר די בחורי חמד, אויסצונוצן די חודש אלול און די ימי הרחמים והרצון ווי עס דארף צו זיין, מוסיף צו זיין בלימוד התורה ומדות טובות, אזוי וועט מען זיכער זוכה זיין צו א כתיבה וחתימה טובה ושנת גאולה וישועה.





Opmerkingen


bottom of page