דראמא אין מירון: קריזיס איבער אינשורענס האלט אפ הכנות פאר ל״ג בעומר

מוצאי שב"ק פ' אחרי קדושים • ח' אייר תשפ"ו | בחצרות הקודש

אין בעפארברייטונג צום היי יעריגן הילולא ל"ג בעומר אין מירון, הערשט גרויס זארג ביי שלומי אמוני ישראל, נאך א פאדערונג פון די "וועדת החמישה" וועלכע פארפירט אויפן גאנצן מתחם הציון אין מירון, וועלכע האבן קלאר געשטעלט אז זיי וועלן נישט נעמען קיין שום שריט אן א פערזענלעכע פארזיכערונג-דעקונג פאר די קאמיטע מיטגלידער. די זכרונות פונעם שוידערליכן מירון טראגעדיע אין יאר תשפ"א שוועבן נאך אלץ אין די לופטן, און די חברי הוועדה האבן מורא צו דארפן טראגן קרימינאלע אדער ציווילע אחריות אויף זייערע פלייצעס אין פאל פון אן אומגליק היו לא תהיה.

די אנגעצויגנקייט איז ארויף א שטאפל ווען די קאמיטע האט פאקטיש פארשלאסן די טויערן פונעם בארג פאר די פראדוקציע-פירמעס וועלכע האבן געזאלט ליפערן סחורה ווי פארענטשעס, סטעידזשעס, גדרים,  א.ד.ג. און שוין וואכן וואס די אלע וויכטיגע  עקוויפמענט זענען געבליבן שטעקן אן קיין פארשריט.

אין די לעצטע מינוט האט זיך די פאליציי אריינגעמישט מיט א שארפע ווארנונג, קלארשטעלנדיג אז דאס אפשטעלן די ארבעט שטעלט אין סכנה די אלע טויזנטער עולי מירון, און אן די נויטיגע זיכערהייט-ערלויבעניש וועט מען נישט קענען אפרעכטן ל"ג בעומר אין מירון. פון די אנדערע זייט, האבן די רעגירונג באאמטע פעסטגעשטעלט אז די מדינה האט שוין באצאלט א פולשטענדיגע אינשורענס פאר די הילולא און ס'איז נישטא קיין שום בארעכטיגונג פאר ספעציעלע פערזענלעכע דעקונג פאר די וועדת החמישה.

די ישועה איז ענדליך געקומען ווען דעם פינאנץ-מיניסטעריום האט זיך אריינגעלאזט בעובי הקורה און ארויסגעגעבן אן אפיציעלע דעקונג פאר די וועדת החמישה סיי פינאנציעל און סיי לעגאל. דער בריוו גיט זיי אינשורענס און שוץ קעגן קלאגעס, אויב אלע צוגרייטונגען אין מירון זענען אין איינקלאנג מיט זייערע רעגולאציעס.

אלנפאלס האפן ערליכע אידן אז מען זאל ווייטער קענען מתפלל זיין און זיך פרייען בהילולא דרשב"י וואו איינגעפירט דור דור.