רייע אסיפות הרבנים במעונו פון הגאון ר' מלכיאל קאטלער ראש ישיבת ביהמ"ד גבוה אלס הכנה צו מעמד נשגב "אדירי התורה"

מיטוואך פ' בהר בחקותי • כ''ג אייר תשפ"ה | בחצרות הקודש

מיט בלויז געציילטע וואכן פארבליבן צום היסטארישן כנסייה לכבודה של תורה די מעמד ''אדירי התורה'' וואס וועט אפגעראכטן ווערן  י"ב סיון, זונטאג בהעלותך, בהתאסף ראשי עם יחד שבטי ישראל לומדי תורה באלפי', האט הגאון הגדול רבי מלכיאל קאטלער ראש ישיבת ביהמ''ד גבוה ד'לעיקוואד פאררופן א רייע געמיינזאמע אסיפות במעונו פאר די רבנים וראשי ישיבות פון שטאט וואו די רבנים זענען פארבעטן געווארן מחזק צו זיין דעם ציבור זיך משתתף צו זיין אין דעם מעמד נשגב לכבודה של תורה.

עס זענען אפגעהאלטן געווארן עטליכע באזונדערע אסיפות פאר די רבנים וראשי ישיבות פון אלע שיכטן און קרייזן אין לעיקוואד, ליטווישע ספרדישע און חסידישע צוגלייך. אנדערש ווי די פריערדיגע יאהרן ווען מען פלעג צוזאמרופן אלע רבנים צו א גענעראל פארזאמלונג. דער ראש הישיבה הגאון רבי מלכיאל שליט"א האט אדרעסירט די אסיפות מיטן ציל צו פאראייניגן גאנץ לעיקוואד, יעדער זאל שפירן א חלק אין דעם מעמד אדיר אפצוגעבן דעם פאסיגן יקרא דאורייתא און כבודה של תורה ותומכי', פאר די טויזנטער הוגי ועמלי תורה פון די גרעסטע תורה-צענטער אין אמעריקע, ביהמ"ד גבוה דלעיקוואד.

צווישן די רבנים פון די חסידישע קרייזן וואס האבן אנטייל גענומען ביי די אסיפות האבן זיך אנגעזעהן: כ"ק אדמו"ר מסקולען לעיקוואד שליט"א, הגה"צ רבי מרדכי בצלאל קליין דומ"ץ סאטמאר לעיקוואד, הגה"צ רבי אברהם שמואל ענגלענדער אבד"ק סאטמאר לעיקוואד, הגה"צ רבי משה שמעון וואזנער אבד"ק שאטו פארק, הגה"צ ר' שלמה פרענקל שליט"א אב"ד וויעליפאלי לעיקוואד, הגה"צ רבי שאול שמחה פרידמאן אבד"ק שמן למנחה נאדפאלע, הרה"ג רבי שלמה זלמן פרידמאן אבד"ק סאנטוב, הרה"ג רבי יואל בער לאבין אב"ד דראהביטש, הרה"ג ר' יצחק אונסדארפער שליט"א אב"ד שבילי דוד, המשפיע הרב שלום מרדכי רובאשקין, דייני ק"ק בעלזא, סקווירא, צאנז קלויזנבורג און נאך.