שפאנונג ביי תלמידי וחסידי קאשוי צום ערשטמאליגן שבת בצל הקודש פון האד' מקאשוי אין שטאט קרית יואל יצ"ו

דינסטאג פ' תולדות • כ"ז חשון תשפ"ו | בחצרות הקודש

מיט התלהבות און פרייד גרייטן זיך תושבי קרית יואל צום ערשטמאליגן "קאשוי שבת" אין שטאט קרית יואל, וואס וועט געפראוועט ווערן בראשות כ"ק אדמו"ר מקאשוי שליט"א, וועלכע וועט באשיינען דעם שבת מיט די געהויבענע תפילות ועריכת השולחנות, אויף א גייסטרייכן פארנעם, ווען הונדערטער תושבי קרית יואל, תלמידי וחסידי קאשוי, ובמיוחד די אברכים תלמידי יוצאי הישיבה, וועלן האבן די געלעגנהייט זיך מסתופף צו זיין בצל הקודש, און זיך אנשעפן פונעם באר מים חיים, מיט חיזוק והתרוממות אויפ'ן גאנצן יאר.

דער שבת קומט אויף די פארלאנג פון די פילע יוצאי הישיבה וואס וואוינען היינט ברחבי העיר קרית יואל, און לעכצן נאך די אומפארגעסליכע שבתים בצל הקודש פונעם רבי'ן שליט"א, מיט וואס זיי זענען אויפגעוואקסן אין די ישיבה יארן ווען בצילו חמדתי וישבת"י, און דערמיט אנהאלטן דעם קשר עליון מיט'ן רועה נאמן רבם ומאורם. דערצו די פילצאליגע תלמידי וחסידי קאשוי וואס בענקען נאך א "קאשוי שבת" ווי עס געדענקט זיך נאך בהלו נרו עלי ראשינו פון הרה"ק מקאשוי זי"ע. נאך לענגערע הפצרות איז דער רבי שליט"א נעתר געווארן לבקשתם זיך צו מטריח זיין בטלטולא דאורחא, און פראווענען דעם ערשטמאליגן שבת אין די שטאט קרית יואל.

די תפילות ברוב עם הדרת מלך, און עריכת השלחנות וועלן געפראוועט ווערן בצוותא בחדא, אינעם רחבות'דיגן לאקאל, בית המדרש 'היכל יצחק' אויף 101 פארעסט רד.

עריכת שולחן הטהור ליל שבת קודש, וועט זיין בשעה 9:00, אנגעהויבן פון שלום עליכם און קידוש, וואו מען וועט לאנגע שעות זיך מתענג זיין בנועם השבת, מיט זמירות שירות ותשבחות, דברות קודש און ריקודי שמחה לכבוד השב"ק.

דער הויכפונקט וועט געוויס זיין בעת רעוא דרעוין, ביים מעמד שלש סעודות, בשעה 4:50, ווען מען וועט זינגען אינאיינעם בהתעוררות רב די זמירות לשב"ק מיט די ניגונים און נוסחאות המקובלים בצל הרה"ק מקאשוי זי"ע, דערנאך וועט מען האבן די זכיה צו הערן דברי כיבושין און התעוררות מפום ממלל רברבן דעם רבי'ן שליט"א, הדרכה לימות החורף הבעל"ט, מתובל בדברי התחזקות והתבוננות בכל עניני החיים.

אין א באזונדערע מאורע נכבדה, געווידמעט אויסשליסליך פאר תלמידי יוצאי הישיבה, וועט געפראוועט ווערן א סעודת מלוה מלכה וכינוס מרעים, פאר די אברכים היקרים, בבית אכסניא אין שטוב פון הרבני הנגיד הרה"ח ר' יוסף פנחס סטרולאוויטש שליט"א, ווי מען וועט האבן די זכיה צו פארברענגען בצל הקודש פונעם רבי'ן, אויף מער א פריוואטע און ענגע פארנעם, בלויז פאר די תלמידים וואס האבן געהאט די זכיה צו לערנען בתוככי ישיבתו הרמה, צו אנהאלטן דעם קשר כמים הפנים לפנים.

דער שבת אנטשפרעכט צו ברענגען א רייע פעולות נכבדות פאר תלמידי וחסידי וקאשוי תושבי העיר קרית יואל, מרחיב צו זיין גבולי הקדושה ביתר שאת, צו קענען מרים זיין די כח הקדושה והתאחדות התלמידים אין שטאט, על דרך הרה"ק מקאשוי זי"ע ויבלחט"א בנו כ"ק אדמו"ר מקאשוי שליט"א עד ביאת הגואל.