שבת מלא התרוממות והתעלות געפראוועט געווארן צום ערשטע מאל אין שטאט קרית יואל בצל האד' מקאשוי

דאנערשטאג פ' ויצא • ז' כסלו תשפ"ו | בחצרות הקודש

תושבי קרית יואל האבן געהאט די זכיה מיטצולעבן אן ערשטמאליגע שבת פון התרוממות הנפש והתעלות בראשות כ"ק אדמו"ר מקאשוי שליט"א, וועלכע האט צום ערשטע מאל אפגעראכטן א שבת אינאיינעם מיט תלמידיו ומעריציו אין שטאט קרית יואל יצ"ו.

די געטרייע עסקנים האבן אריינגעלייגט איבערמידליכע כוחות די שבת זאל געקרוינט ווערן מיט די העכסטע מאס הצלחה, ב"ה אז עס איז טאקע געלונגען אהערצושטעלן א העכסט געלונגענע אפאראט, צוברענגענדיג דעם שבת צום קלימאקס. באזונדער איז אריינגעלייגט געווארן כוחות אהערצושטעלן די היכל השולחנות והתפילות וואס איז אויסגעשטעלט געווארן מיט די מאקסימום זיץ-פלעצער מעגליך.

די רבי שליט"א האט דערגרייכט די שטאט קרית יואל ערב שבת אין די נאכמיטאג שעות, די אכסניא איז געווען אין שטוב פון הרבני הנגידר' יוסף פנחס סטרולאוויטש שליט"א. שפעטער נאכמיטאג האט הנגיד ר' וואלף לעפקאוויטש הי"ו מחשובי תלמידי הרה"ק מקאשוי זצ"ל, אריבערגעברענגט דעם קליינע ספר תורה פון הרה"ק רבי איציקל מפשעווארסק זצוק"ל מאוצרו הטוב, מיט וואס מען האט זיך באנוצט במשך דעם גרויסן שבת, דער רבי האט זיך שטארק באדאנקט וואונטשנדיג ברכות לרוב.

ארום א האלבע שעה נאכן זמן רבי שליט"א איז אריינגעקומען אין ביהמ"ד, און געזאגט שיר השירים, דערנאך יורד געווען לפני התיבה צו תפילת מנחה בהתעוררות רב. דער בית המדרש איז געווען איבערגעפילט פון ברעג צו ברעג, נישט קענענדיג נאכקומען די גרויסע פארלאנג פון פלעצער.

צו קבלת שבת איז צוגעגאנגען הרה"ח ר' אברהם יהושע פריינד שליט"א מנאסויד, און נאכ'ן דאווענען איז דער ציבור און געסט אריבער שלום נעמען פון רבי'ן שליט"א, און געוואונטשן גוט שבת, ווען דער רבי נעמט יעדעם אויף במאור פניו און וואונטשט צוריק בברכת שבתא טבא.

דערנאך איז פארגעקומען די סעודה ליל שב"ק אינעם ספעציעל דעזיגנירטן זאל פאר אלע געסט, און בחורי חמד, באשיינט דורך די משמשים בקודש אין שפיץ פון דעם רבינס קינדער.

ארום 9:20 איז דער רבי ערשינען צום עריכת שולחן הטהור אין ביהמ''ד וואו עס איז געווען פארזאמלט א ריזן ציבור תושבי קרית יואל חסידים ואנשי מעשה פני ונכבדי העדה פון אלע יארגענג. באזונדער האט זיך אנגעזען נכדי הרה"ק מקאשוי זצוק"ל וועמען דער רבי האט מכבד געווען בכבוד הראוי. במשך די טיש איז געווען א כסדר'דיגע שטראם פון אידן וואס זענען געקומען פון אלע געגנטער זיך מיטווארעמען באור זיו קדושת השבת מנהר היוצא מעדן.

דער רבי האט אנגעהויבן מיט שלום עליכם מיט'ן מקובל'דיגע נוסח, און דאן קידוש געמאכט בקול רם. נאך נטילת ידים האט מען אויפגעגעבן די מאכלים. דורכאויס דעם טיש האבן א קבוצה פון תלמידי ישיבה גדולה ד'קאשוי אנגעפירט מיט די ניגונים.

מיט זמירות האט די רבי מכבד געווען די רבנים ואנשים חשובים ביים טיש; כ"ק אדמו"ר מתפארת יחזקאל שליט"א, הגה"צ אבד"ק שארמאש שליט"א, הרב רבי יואל יהושע העשיל בלום שליט"א, בן כ"ק אדמו"ר מתולדות רפאל קאשוי און נאך.

נאך די זמירות האט דער רבי משמיע געווען דברי דרוש ואגדה פאר א לענגערע צייט, איבער די געוואלדיגע כח התפילה און וויפיל מען קען אויס'פועל'ן ביים דאווענען צום אויבערשטער.

נאכ'ן בענטשן האט מען ממשיך גווען די זמירות און אריינגעברענגט פירות. און דער ציבור איז דורכגעגאנגען נעמען פירות. צום שלוס האט מען זיך ארויסגעלאזט אין א ריקוד און דער רבי איז אהיים לבית האכסניא.

שב"ק אינדערפרי איז דער רבי שליט"א געגאנגען אין מקוה בבית האכסניא, און שפעטער אריינגעקומען צו תפילת שחרית. דער רבי איז צוגעגאנגען צו פתיחת הארון און ארויסגענומען די הייליגע ספר תורה וואס איז גענוצט געווארן דורך הרה"ק רבי איציקל מפשעווארסק זי"ע, נאכן עולה זיין שישי האט דער רבי געמאכט א מי שברך פאר אלע געסט און פני העדה, אזוי אויך פאר אלע תלמידים און בחורים, און ספעציעל פאר'ן בעל אכסניא ובני משפחתו.

נאכ'ן דאווענען איז מען אריבער זאגן גוט שבת, און מען האט אהיימבאגלייט דעם רבי'ן צום בית האכסניא, וואו עס איז אפגעראכטן געווארן א הערליכע סעודה אינאיינעם מיט די בעל אכסניא ובני משפחתו, און די משמשים בקודש.

דער רבי איז אריינגעקומען צו תפילת מנחה ארום צען צו פינף, ווען די ביהמ"ד איז געווען פיל געפאקט מיט א שטראם פון אידן הצמאים לשמוע את דבר ה', וואס זענען געקומען מיטצוהאלטן די זמן רעוא דרעוין.

ביי די דברות קודש האט די רבי צוערשט זיך געשטעלט אויף די פסוקי הפרשה, און דערביי אויסגעשמועסט אז ווען מען קומט זיך צוזאם ביי אזא שבת און מען טרעפט זיך אינאיינעם חסידים ותלמידים פון רבי'ן זי"ע, איז די פאסיגע זאך ארומצורעדן און אויסשמועסן אינאיינעם ענינים וואס דער רבי זי"ע פלעגט רעדן און פארלאנגען. דערביי האט ער ארומגערעדט מיט לענגערע דברי כיבושין בחיזוק והתבוננות און דברי הדרכה צום אנהייב יאר, סיי בעניני לימוד התורה, סיי בעניני תפילה, סיי מיט די נסיונות הזמן, ועניני אמונה, מידות טובות, ענינים הנוגעים בין אדם לחבירו ובין אדם למקום, און איבער די שעדליכקייט פון פארשווענדן די צייט מיט הבלי העולם הזה זייענדיג פארזונקען אין נייעס און תאוות, און די וויכטיגקייט אויסצונוצן די טעג און די וואכן פאר התעלות בעבודת ה'.

נאך מעריב מוצאי שבת איז מען אריבער וואונטשן א גוטע וואך און א גוט יאר, ווען דער רבי וואונטשט צוריק במאור פנים פאר יעדן באזונדער און זיך באדאנקט פאר די באטייליגטע און די עסקנים פארן ארויסהעלפן און מיטהאלטן ביים שבת קודש בשבת אחים.

דער רבי האט געמאכט הבדלה, און נאך הבדלה האט מען געזינגען המבדיל און מען האט געזאגט אינאיינעם ויתן לך. דערנאך האט מען ארויסבאגלייט דעם רבי'ן בשירה ובזמרה נאך אזא געהויבענעם שבת.

שפעטער ביינאכט זענען זיך צוזאמגעקומען א שיינעם ציבור תלמידים, ביים ספעציעלן סעודת מלוה מלכה וכינוס מרעים פאר תלמידי אברכים יוצאי הישיבה הקדושה, וואו מען האט פארברענגט בשבת אחים גם יחד אויף א פריוואטן פארנעם אינאיינעם מיט'ן רבי'ן שליט"א דער ראש הישיבה.

עס איז געווען א הערליכער מחזה הוד צו זען די אלע יונגעלייט זיצן אינאיינעם בשבת אחים ומלכם בראשם, און פארברענגט אינאיינעם בשירות ותשבחות, בדיבוק חברים.

דער רבי האט געוואונטשן לחיים פארן גאנצן ציבור, און מען האט געזינגען די זמירות. נאך די זמירות האט דער רבי מכבד געווען הרה"ג ר' יואל מייזעלס שליט"א, משפיע אין די ישיבה, ער זאל ארויסברענגען די נחיצות פון די היינט נאכטיגע מסיבה.

דערנאך האט אויפגעטרעטן איינער פון די חשובע יונגעלייט הר"ר דוד ארי' שווארץ הי"ו מחשובי יוצאי הישיבה, וואס האט באגריסט די חשוב'ע חברים און ארויסגעברענגט די זכיה וואס מען האט געהאט בייצוגעוואוינען אזא געהויבענע שבת וואס מען האט מיטגעלעבט. ארויסברענגענדיג אז מען דארף ווייטער אנהאלטן די התעוררות, און אנקניפן א ווייטערדיגע קשר און אחדות פון תלמידי ויוצאי ישיבת קאשוי אין שטאט קרית יואל.

דערביי האט ער מיט עקסטאז געבראכן געווארן די בשורה מרנינה, אז מען גרייט זיך אי"ה בקרוב צו גומר זיין אויף א מקום מוכשר פאר א נייעם בית המדרש אין שטאט קרית יואל פארן היימישן עולם און די תלמידי הישיבה, וואו מען וועט אינאיינעם בקביעות פארברענגען בשבת אחים יעדן שבת.

נאכדעם האט מען געהאט די זכיה צו הערן דברי ברכה און סיפורי צדיקים פונעם ריש מתיבתא די רבי שליט"א. נאכ'ן בענטשן זענען אלע תלמידים אריבערגעגאנגען וואונטשן א גוטע וואך און זיך געזעגנט מיט ברכות לרוב.

אזוי אויך זענען אריין בקודש פנימה א קבוצה פון עסקנים איבערצוגיין די ווייטערדיגע פלענער פארן נייעם ביהמ"ד למען הרחבת גבולי הקדושה אין שטאט קרית יואל. אויפ'ן וועג ארויס האט דער רבי זיך באדאנקט פאר'ן חשוב'ן בעל אכסניא, הר"ר יוסף פנחס הי"ו ובני משפחתו, פאר'ן צושטעלן זיין דירה פאר'ן שבת ביד רחבה מיט אלע באקוועמליכקייטן.

בחצות הלילה האט זיך רבי צוריקגעקערט לבית נאוה קודש אין וויליאמסבורג, מלא ברכות ה' איבערלאזנדיג הויפענעס חיזוק וחיות דקדושה פאר די באליבטע תלמידים ותושבי עיר קרית יואל.