מעמד חנוכת הבית פאר נייע ביהמ"ד טעמעשוואר אין שטאט אלעד אינאיינעם מיט שבע ברכות אין רבינס הויף

פרייטאג פ' משפטים • כ''ו שבט | בחצרות הקודש

בילדער קרעדיט: שוקי לרר

הונדערטער פון כלל אוהדי, ידידי וחסידי בית טעמעשוואר אלעד האבן געפרייט און געפייערט דעם היסטארישן מעמד "חנוכת הבית" פונעם נייעם בנין בית המדרש הגדול, וואס נעמט אריין א פראכטפולע שטיבלאך קומה, א מהודר'דיגן און שיינעם מקוה טהרה, דעם גרויסן בית המדרש און היכל התורה, און נאך פילע אפטיילונגען.

דער מעמד האט זיך אנגעהויבן מיט תפילת ערבית און קביעת מזוזה דורכ'ן אדמו"ר שליט"א ביים איינגאנג צום היכל הגדול, באגלייט מיט שירי דביקות והתעוררות. דערנאך איז אין רחבת בית המדרש פארגעקומען א הערליכע סעודת מצוה בהשתתפות אדמורי"ם, רבנים און אישי ציבור.

דער מעמד איז אנגעפירט געווארן בטוב טעם דורך הרב משולם זלמן לייפער, א זון פון רבי'ן און משגיח ישיבה גדולה עץ חיים ד'באבוב אין בני ברק. במשך די מעמד האבן די משתתפים זוכה געווען צו הערן דברות קודש פונעם רבי'ן שליט"א. אויך האט גערעדט הרב איתמר לייפער, בנו הגדול פונעם רבי'ן און יושב ראש ועד "קרן הבנין", ווי אויך הגאון ר' זושא הורביץ אב"ד דקהילות החסידים אין אלעד.

צום סיום המעמד האט מען פארטיילט תעודות הוקרה פאר די נדיבים חשובים, און דער רבי האט פארטיילט כוס של ברכה פאר אלע משתתפים, נאכגעפאלגט מיט ריקודין של שמחה.