פרייליכע שמחת החתונה אין הויפן פון מאחנובקא בעלזא - יערוסלאב - שידולובצא - ערלוי

דינסטאג פ' מקץ • כ''ו כסלו - ב' ד'חנוכה תשפ"ו | בחצרות הקודש

בילדער קרעדיט: שוקי לרר

חסידי מאחנובקא בעלזא האבן פארלאפענעם וואך מיטגעהאלטן דער שמחת נישואין בחצר הקודש, פון א אייניקל ביי כ"ק אדמו"ר ממאחנובקא בעלזא שליט"א, די כלה א טאכטער פון זיין זון הרה"צ ר' יחיאל מיכל רוקח שליט"א, איידעם ביי כ"ק אדמו"ר מיערוסלאב שליט"א, מיט די חתן א זון פון הרה"צ ר' שמעון שמואל קארנרייך שליט"א בנו הגדול כ"ק אדמו"ר משידלובצא שליט"א, און איידעם ביי הגה"צ אבד"ק ערלוי בני ברק שליט"א, וואס איז געפראוועט געווארן אין גרויסן מחנובקא בעלזא בית מדרש אין בני ברק.

מאנטאג נאכמיטאג ביום החופה איז כ"ק אדמו"ר ממאחנובקא בעלזא שליט"א ארויף צום שטוב פון זיין זון דער מחותן הרב יחיאל מיכל שליט"א וואו ער האט זיך געזעגענט פון די כלה כנהוג. ביים קבלת פנים איז דער מרא דאתרא הגה"צ רבי חיים יצחק אייזיק לאנדא גאב"ד בני ברק מכובד געווארן מיט קריאת התנאים, און די רבי מיט די מחותנים האבן אנגעטוהן פארן חתן די מלבושי קודש מאוצרו הטוב, די יארמולקע פונעם הייליגן אפטא רב זי"ע און דער קיטל און גארטל פון הרה"ק מבעלזא זי"ע.

ביים מעמד החופה איז די זיידע כ"ק אדמו"ר משידלובצא שליט"א מכובד געווארן מיט סידור קידושין, קריאת הכתובה די זיידע כ"ק אדמו"ר ממאחנובקא בעלזא שליט"א, ברכות ראשונות די זיידע כ"ק אדמו"ר מיערוסלאב שליט"א, ברכה אחריתא די זיידע הגה"צ אב"ד ערלוי בני ברק שליט"א, נאך די חופה האט מען זיך ארויסגעלאזט אין פייערדיגע טענץ לכבוד די שמחה.

נאכן חופה האט די ציבור מיסב געווען צום סעודת החתונה אין אלע היכלות בבנין ביהמ"ד הגדול, און אין די זעלבע צייט איז מען אריין אל הקודש פנימה איבערגעבן דרשה געשאנק כנהוג. ארום ניין אזייגער איז די רבי ערשינען לקול תרועת הזמר, זיך געוואשן צום סעודה און געוונטשן לחיים לכל הקהל הקודש.

נאכן בענטשן האט מען ממשיך געווען די ריקודין של שמחה, ווי מען האט זיך משמח געווען בשמחת חתן וכלה, במשך די ריקודין איז די גאנצע ציבור דורך ביים רבין שליט"א און די מחותנים וואונטשן מזל טוב. דורכאויס די שמחה האבן זיך אנגעזען אדמורי"ם ורבנים וקרובי המשפחה צווישן זיי האדמורי"ם מנדבורנא, מודזיץ, סטריקוב, גארליץ, זוועהיל ארה"ב, ביאלא בית שמש, ביאלא פשיסחא, ביאלא רמת אהרן, קארלין לעלוב, גאב"ד ראצפערט בראזיל, אב"ד סטריקוב ב"ב, אב"ד צאנז ב"ב, אב"ד ראחמיסטריווקא ב"ב, אב"ד אביר יעקב תל אביב, גאב"ד פרדס כץ און נאך.

נאך חצות הלילה האט מען צוגעטרעטן צום מצווה טאנץ, צום ערשט זענען געטאנצן די זיידעס האדמורי"ם משידלובצא, יערוסלאב און אב"ד ערלוי בני ברק, דערנאך די מחותנים פון ביידע צדדים. דאן האט די רבי שליט"א אפגעראכטן די ריקודין קדישין לפני הכלה מיט גרויס התלהבות, און דערנאך געטאנצן מיט די חתן און מחותנים, און א באזונדערע ריקוד מיט הרה"צ רבי יצחק טווערסקי מסקווירא, און דערנאך א רינג מיט די בני משפחת המלוכה. עס איז געווען קרוב צו צוויי אזייגער אויפדערנאכט ווען מען האט פארענדיגט די חתונה הרוממה, און די גאנצע ציבור איז דורך וואונטשן מזל טוב.