מיטוואך פ' חיי שרה • כ"ד חשון תשפ"ד| בחצרות הקודש
א שארפע בריוו איז נעכטן ערשינען דורך די גדולי הדור בארץ הקודש, וועלכע פארטרעטן בראש פון די וועד הרבנים לעניני תקשורת, וואו זיי טוען מעורר זיין דעם ציבור צו זיין אפגעהיטן פון הערן אלע סארט האטליינס למיניהם, איבערהויפט די האטליינס וואס ברענגען נישט כשר'ע נייעס און אפהאנדלונגען פון די אלגעמיינע טעלעוויזיע.
די דריי גדולי הדור, כ"ק אדמו"ר מויזניץ שליט"א, הגאון הגדול רבי משה הלל הירש שליט"א ראש ישיבת סלאבאדקע, און הגאון ר' משה מאיה, וועלכע זענען די העכסטע אויטאריטעטן אינערהאלב די וועד הרבנים, און האבן שוין אויפגעטון גאר אסאך אין דעם געביט, האבן אינעם פאראייניגטן קול קורא ארויסגעברענגט די שרעקליכע פראבלעם וואס הערשט אין די יעצטיגע טעג ווען עס הערשט א מלחמה צושטאנד איבער די וועלט, און אלע סארט מענטשן קומען מסביר זיין מיט דעות כוזבות און אייגענע טעאריעס, וואס גרעניצט זיך זייער אסאך מאל מיט כפירה ומינות ח"ו. דעריבער דארף מען זיין געווארנט און זיך נישט צוהערן צו אזעלכע טעלעפאן ליניעס.
די גדולי הדור שרייבן אינעם בריוו ווי פאלגענד: בימים אלו אשר בעווה"ר נתעוררה מידת הדין כאשר דם ישראל נשפך כמים רח"ל ורבים נתונים בשבי ובמצוק, עדים אנו להתעוררות גדולה באמונה שאין עוד מלבדו ואם הוא ית' לא ישמור עיר שווא שקד שומר, ושאין לנו אלא לתלות מחסנו ומבטחנו בו ית' ולזעוק ולהתחנן לישועתו, ולהתחזק בעמל התורה ובתיקון המעשים. אמנם לדאבוננו זה לעומת זה מוצא היצר דרכים להעמיד רבים בנסיון, על ידי קווי הנייעס המביאים שידורים מהתקשורת החיצונית הקלוקלת ומחדירים בשומעיהם לשים יהבם בחיל ובכוח ומלאים בהרגשת 'כוחי ועוצם ידי', ומשכיחים הכתוב "שקר הסוס לתשועה וגו' הנה עין ד' אל יראיו למיחלים לחסדו", ואשר בפרט לעת כזאת יש בכך סכנה גדולה ח"ו".
דערביי טוען די גדולי הדור אויפפאדערן פון יעדן איד, נישט צו מבטל זיין צייט דערויף, און נישט האבן קיין מגע ומשא דערמיט, וויבאלד דאס איז פארבינדן מיט גרויסע איסורי תורה."וזכות ההתעוררות והחיזוק בתורה וביר"ש תעמוד לנו למען ישוב חרון אפו ונזכה לראות בקרוב בישועתו בגאולת עולמים".