האד' מקאשוי וועט פראווענען שבת אין שטאט מאנסי מיט באטייליגונג פון א ריזן צאל חסידים ואנשי מעשה

דאנערשטאג פ' בא • ד' שבט | בחצרות הקודש

תלמידי וחסידי קאשוי פון די שטאט מאנסי בפרט און פון רחבי ניו יארק בכלל, גרייטן זיך מיט געהויבענע געפיהלן צום שבת של שמחה בצל הקודש פון כ"ק אדמו"ר מקאשוי שליט"א, דעם קומענדיגן שבת פרשת בא אין די שטאט מאנסי יצ"ו.

דער שבת קומט פאר לרגל השמחה בבית צדיקים, ווען עס וועט גיין אונטער די חופה בשעה טובה החתן פרי עץ חיים הרב רפאל שליט"א בן הרה"ג ר' יואל בלום שליט"א רב דביהמ"ד התאחדות אברכים ברכות שמים דקאשוי אין שטאט מאנסי, חתן הגה"צ אב"ד ור"מ ויצב אברהם מעלבארן-אוסטראליע שליט"א, עב"ג הכלה תחי' בת הגה"צ רבי אשר מאנן שליט"א דומ"ץ קיט"ל מירטל ומח"ס שו"ת אחוזת הלוי, ווען צום אנהייב פון די געהויבענע ימי השמחה וועט דער דערהויבענע זיידע כ"ק אדמו"ר מקאשוי שליט"א אפרעכטן דעם שב"ק עליה לתורה פונעם אייניקל, בקרב עדת צאן מרעיתו אין מאנסי.

די תפילות ועריכת השולחנות וועלן פארקומען אינעם היכל הבית המדרש אויף 48 סוזען דרייוו. ביי די עריכת השולחן פרייטאג צונאכט איז ערווארטעט א ריזן ציבור פון די גאנצע שטאט חסידים ומעריצים וואס ווילן נישט פארפאסן דעם געהויבענעם שבת קודש, די עסקנים ארבעטן אין די טעג אויס די פונקטליכע פלענער צו קענען אקאמאדירן דעם גאנצן עולם, אויף די פארענטשעס לענגאויס דעם בית המדרש, איש על מחנהו ואיש על דגלו.

שבת קודש אינדערפרי וועט פארקומען די שמחת עליה לתורה און די קידושא רבה לרגל המאורע, בקול רנה ותודה. און שפעטער די עריכת השולחן בעת רעוא דרעווין איז ערווארטעט די באטייליגונג פון א גרויסן ציבור תלמידים וחסידים, וואס וועלן זיך באטייליגן און זיך דערווארעמען ביי די געהויבענע מאמענטן, און הערן די דברי מוסר והתחזקות לימי השובבי"ם. זיך גרייטנדיג צו די חתונה הגדולה ווען די אבות הק' קומען אראפ פון גן עדן אנטייל נעמען, און איבערלאזן ברכות לרוב פאר אלע משתתפים תלמידים ומעריצים.

די געהויבענע שמחת החתונה וועט פארקומען קומענדיגן מיטוואך בשלח בשעה טובה ומוצלחת, אין די זאלן פון ויואל משה אין וויליאמסבורג , בהשתתפות פילע תלמידים וחסידים יוצאי ובני הישיבות, אין שפיץ פון רבני ואדמור"י העיר שליט"א, וואס וועלן זיך מיטפרייען מיט די געהויבענע מחותנים ובעלי השמחה הגאוה"צ שליט"א.

דאס וועט קומען צום קלימאקס ביי די גאר געהויבענע מצוה טאנץ פונעם רבי'ן שליט"א, וואס וועט מקיים זיין דעם "כיצד מרקדין לפני הכלה" מיט התרוממות הנפש, מיטשלעפנדיג דעם גאנצן ציבור אין דעם עת משוש, מיט א שמחה דקדושה.

פאר תלמידים ויוצאי הישיבה אין שטאט מאנסי, וועלן זיך די ימי השמחה ציען ווייטער, מיט א רייכע שמחת השבע ברכות, צוגעשטעלט דורך די מתפללי ביהמ"ד התאחדות אברכים ברכות שמים קאשוי, וועלכע געניסן שטענדיג מאורו הבהיר פונעם הרה"ג דער מחותן שליט"א, וואס וועט פארקומען קומענדיגן מאנטאג ט"ו בשבט אויפדערנאכט.

עס איז דער וואונטש, אז די שמחה הגדולה זאל ברענגען השפעות טובות לנו ולכל ישראל, און דער רבי שליט"א און געהויבענע זיידעס זאלן ווייטער זען בלויז תענוג ונחת דקדושה, עוד ינובון בשיבה דשנים ורעננים, זיך צו פרייען אינאיינעם מיט די באליבטע תלמידים הקרויים בנים, מתוך נחת ושמחה כל הימים.