זוועהילער חסידים מיטגעהאלטן שבת שלום זכר אין שמחת הברית מילה לבן הנולד ביי האד' מזוועהיל | ברייטע דעקונג

זונטאג פ' שמות • י"ט טבת תשפ"ד | בחצרות הקודש

בילדער קרעדיט: שוקי לרר

הונדערטער זוועהילער חסידים האבן זיך היינט מיטגעפריידט בשמחתו פון כ''ק האדמו''ר מזוועהיל שליט''א ביים שמחת הברית מילה לבן הנולד ביים רבי'ן שליט''א.

די שמחה האט זיך אנגעהויבן דעם שב"ק פרשת ויחי העל"ט ביים שבת שלו' זכר, וואס איז געפראוועט געווארן בהיכל ביהמ"ד הגדול דחסידי זוועהיל אין ביתר, ברוב עם הדרת מלך, מיט די באטייליגונג פון הונדערטער אידן חסידים אין געסט פון אלע שטעט איבער גאנץ ארץ ישראל. א גרויסער ציבור האט געשטראמט צום שולחן הטהור ליל שבת צו אפגעבן דעם מזל טוב פאר דער בעל שמחה די רבי שליט"א, במשך גאנצע דריי שעה האבן זיך טוינזטער אידן תושבי ביתר געשלענגערט דורכצוגיין וואונטשן מזל טוב און די רבי האט יעדן צוריקגעוואונטשן במאור פנים. עס האט זיך דערביי אנגעזעהן חשובע אדמור''ים ורבנים פון שטאט וועלכע זענען געקומען זיך מיטפרייען מיט די שמחה פון רבין שליט"א.

מוצאי שבת נאך הבדלה האט די רבי שליט''א משמיע געוועהן שיחת קודש פאר די חסידים אריינטרעטנדיג אין די ימי השובבי''ם, אין דערנאך איז פארגעקומען די מעמד הקריאת שמע ליינען, וואו די רבי שליט''א האט געליינט קריאת שמע מיט די ילדי החסידות אין מען האט געזינגען עטליכע ניגונים לכבוד די שמחה, נאכן מעמד האט די רבי פארטיילט פעקלעך פאר די ילדי החמד.

היינט זינטאג אינדערפרי נאכן ווארימע דאווענען אין ביהמ''ד הגדול זוועהיל אין שכונת בית ישראל אין ירושלים איז פארגעקומען די שמחת הברית, די רבי שליט''א - אבי הבן האט געזאגט די פסוקי ייחוד, מיט סנדקאות איז מכובד געווארן כ''ק האדמו''ר מגור שליט''א, ברכות וקריאת השם האט געזאגט די גרויסער פעטער כ''ק גאב''ד מאקאווא שליט''א, ויקרא שמו בישראל, 'שלמה' נאכן זיידן כ''ק האדמו''ר מזוועהיל זכר צדיק לברכה, די איבעריגע כיבודים זענען געוועהן ווי פאלגענד: עמידה לברכות הגאון הגדול רבי מיכל זילבער ראש ישיבת זוועהיל, כסא של אלהו הרה''צ רבי דוד טווערסקי אב''ד ראחמיסטריווקא ירושלים, אין די פעטער'ס הרבנים הגאונים הצדיקים לבית זוועהיל.

נאכן ברית איז פארגעקומען א מסיבת לחיים לכבוד די שמחה, די סנדק כ''ק האדמו''ר מגור שליט''א האט געטרינקען לחיים אין אנגעוואונטשן די בעלי השמחה, דערנאך האט מען ממשיך געוועהן די סעודת מצוה מיט פרייליכע ניגונים אין ריקודין של שמחה, עס האבן זיך משתתף געוועהן די מירער ראש ישיבה הגאון רבי אליעזר יהודה פינקל אין כ''ק האדמו''ר מקרעטשניף סיגעט שליט''א וועלכע וואוינען בשכינות, במשך די סעודה האט די רבי געזאגט תורה אין בסיום דבריו זיך צוויינט אין דערמאנט די מצב אין ארץ ישראל, זייענדיג מעורר רחמים פאר אחינו בני ישראל הנתונים בצרה ובשביה.