המוני בני העדה החרדית אפגעצייכנט דריטע יומא דהילולא פון הגה"ק גאב"ד ירושלים זצ"ל בעל שערי טוביה

דינסטאג פ' דברים • ד' אב תשפ"ה | בחצרות הקודש

בילדער קרעדיט: א. אייזנבאך

מאסן אידן בני ירושלים האבן דעם זונטאג אפגעצייכנט די דריטע יומא דהילולא פונעם מרא דארעא קדישא הגה"ק גאב"ד ירושלים זצ"ל בעל שערי' טוביה. די צענטראלע סעודת הילולא צוגעשטעלט מטעם די עדה החרדית און קהל שערי טובי', איז פארגעקומען אין היכל ביהמ"ד הגדול וויזניץ אויף רח' אדוניהו הכהן אין ירושלים במעמד קהל רב בני העדה החרדית ועל צבאם מרנן ורבנן גדולי ישראל שרי התורה חברי הביד"ץ, אדמורי"ם ורבנים וראשי ישיבות און פילע תלמידים פונעם ירושלימער רב זכר צדיק לברכה.

פאר לענגערע שעה'ן זענען די פילע משתתפים געזעסן און אויסגעהערט ווארימע און רייכע דרשות מפי הרבנים הגאונים, וועלכע האבן אלע מעלה געווען זכרונו הבהיר פונעם בעל ההילולא, און זיין לעכטיגע ירושה וואס איז קאי וקיימא.

מיט דברי פתיחה האט אויפגעטראטן דער משמש בקודש הרב חיים יהודה האלצמאן הי"ו. דאן האט אויפגעטרעטן הרבני הנגיד ר' מנחם מארקאוויטש הי"ו פון מאנסי פון די נאנטע מקורבים ביים גאב"ד זצ"ל וועלכע האט מרחיב געוועהן איבער זיין ענווה, פשטות און מידת אמת. דערנאך האט מען געהערט ווארעמע דיבורים פון הגאון רבי עמרם האניג שליט"א דומ"ץ מחזיקי הדת אנטווערפען, וועלכער האט ארומגערעט פון די תקופה ווען דער רב ז"ל האט משמש געוועהן ברבנות אין אנטווערפען, און ווי ער איז געבליבן מקושר מיט די קהלה אפילו נאכדעם וואס ער איז שוין אויפגענומען געווארן אלס מרא דארעא דישראל, זייענדיג דער פוסק אחרון אויף אלע שטאטישע אנגעלעגנהייטן.

נאכן הערן דברי זיכרון פון כ"ק אדמו"ר מקהל חסידי ירושלים שליט"א און פונעם חבר בי דינא דבר הגאון רבי שמעון יצחק שלעזינגער שליט"א רב דקהל אנשי ירושלים, האט אויפגעטרעטן דער נואם הכבוד הגה"צ ר' יששכר דוב איכנשטיין שליט"א האדמו"ר מזידיטשוב באלטימאר וואס האט ארויסגעברענגט געהויבענע שטריכן פונעם רב ז"ל וואס איז געוועהן אן איש האשכולות, בקי בכל מכמני התורה נגלה און נסתר צוגלייך, און ווי זיינע פסקים זענען געוועהן אנגענומען איבער דער גאנצער וועלט.

צום לעצט האט בנו יחידו וחביבו פונעם רב ז"ל, הגה"צ רבי שלמה זלמן ווייס אב"ד שערי טובי' מסיים געווען מסכתא שבת לעילוי נשמתו און משמיע געוועהן קורצע דיבורים לכבוד היום.

בראש המסובים האבן באשיינט דעם פני המזרח האדמור"ים מראחמיסטריווקא, משכנות הרועים, קהל חסידי ירושלים, סקולען ירושלים, קרעטשניף טשערנאוויץ, הגה"צ רבי משה קרעמער שליט"א ממנהיגי ק"ק ברסלב, הגאון האדיר רבי יהושע דוד טורצין שליט"א מנהיגי קהילת פרושים.

חברי הבית דין צדק הגאון הגדול רבי שמעון יצחק שלעזינגר שליט"א, הגאון הגדול ר' שמואל בראנדסדארפער שליט"א, הגאון הגדול רבי אהרן בראנדסדארפער שליט"א, הגה"צ רבי משה קאהן שליט"א ראש ישיבת תולדות אהרן, הגה"צ רבי נחמן בידרמן שליט"א מלעלוב, הגאון רבי משה פאללאק שליט"א מרבני ק"ק סאטמאר, הגאון ר' חיים יוסף בלויא שליט"א רב שכונות פאגי ירושלים, הרה"צ רבי שמעלקא כהנא שליט"א מפשעצלאוו נכד אדמו"רי בית פשעווארסק, הגאון ר' נתנאל פרץ מאירזאהן שליט"א ראש ישיבת חכמת התורה, בני כ"ק אדמו"ר מתולדות אברהם יצחק בשליחות הקודש, און נאך פילע רבנים חשובים, ומורי הצדק פון די עדה החרדית.

דורכאויס זונטאג האבן פילע אידן פוקד געוועהן עם ציון הק' אויפן הר הזיתים, נאכמיטאג איז פארגעקומען די מעמד עלי' לציון רבתי אין שפיץ פון הגה"צ רבי שלמה זלמן ווייס אבד"ק שערי טובי' אינאיינעם מיט א גרויסן ציבור תלמידים ומוקירי זכרו פונעם רב ז"ל, וואו מען האט איינגעריסן לישעותן של ישראל און בפרט איבער די גזירת הגיוס, און די פרישע גזירת חטטי שכבי אין ארץ ישראל.

אין די טעג ארום די יומא דהילולא איז אפגעהאלטן געווארן עצרות התעוררות סיי אין די ישיבה "חכמת התורה" אין ירושלים וואס איז געשטאנען אונטער די נשיאות פונעם רב ז"ל און באזונדער אין די רשת הכוללים אין בית שמש, מיסודו פונעם בעל ההילולא, די אסיפה איז פארגעקומען אין בית המדרש "פרושים" אין רמה ב', וואו עס האבן אויפגעטרעטן די ראשי הכוללים, רבנים און עטליכע פון די באי ביתו ביים רב ז"ל.