זעלטענער איבערלעבעניש ביי התרוממות'דיגער שמחת "הכנסת ספר תורה" דורך ק"ק סאטמאר-מאנסי

דינסטאג פ' ויקהל • י"ח אדר תשפ"ה | בחצרות הקודש

שווער צו שילדערן די גרויסע התרגשות דקדושה וואס האט זיך אפגעשפילט אין ק"ק סאטמאר אין מאנסי דעם פארלאפענעם זונטאג פורים המשולש דמוקפין, ביים היסטארישן שמחת "הכנסת ספר תורה" געשריבן געווארן בשותפות פון כל קהלא קדישא הדין, ווען שווערע הונדערטער אידן לעבן מיט די זעלטן געהויבענע מאמענטן, דורכאויס לאנגע שטונדן פון פראכטפולע מעמדים לכבודה של תורה.

דער "התחלת כתיבת ספר תורה" איז פארגעקומען מיט אומגעפער א יאר צוריק בחודש אדר הראשון העעל"ט אינעם עיר העתיקה קראקא פולין יע"א, נאכדעם וואס ק"ק סאטמאר מאנסי האבן זיך אינאיינעם געהויבן אל ערי האבות לפקוד על ציונים הקדושים אשר בארץ המה בראשות כ"ק גאב"ד סאטמאר מאנסי שליט"א, ווי עס איז דארט על אדמת הקודש פארגעקומען דער התחלה פארן ספר תורה, און יעצט שטייענדיג א יאר שפעטער בימי הפורים אשר הדר קבלוה מאהבה, האט מען בס"ד זוכה געווען לברך על המוגמר מחנך צו זיין דעם הייליגן ספר תורה ברוב פאר והדר.

דעם פארגאנגענעם וואך, איז כ"ק אדמו"ר מסאטמאר שליט"א ווי באריכטעט, ספעציעל ארויסגעפארן קיין מאנסי אריינצושרייבן אן אות אין די ספר תורה. דערביי איז פארגעקומען א מסיבת לחיים אינאיינעם מיט די חברי והנהלת הקהלה. אזוי אויך האט נאכגעפאלגט אין די טעג פון פרשת תשא עטליכע מעמדי "כתיבת האותיות" ספעציעל געווידמעט פאר נגידים בעם שותפים אינעם ספר תורה.

זונטאג נאכמיטאג, ביום שושן פורים, תיכף נאך מעמד מרוגש "הדר קבלוה" - סיום כתיבת האותיות בהיכל הישיבה, איז דער "ספר תורה" ארויסגעפירט געווארן ברוב פאר והדר טאקע באותו מקום פון ערשטן בנין פון קהילת ומוסדות סאטמאר מאנסי, דער "בנין הישיבה" מיסודו פון הרה"ק מסאטמאר זי"ע, און איז געפירט געווארן אויף "מאנסי'ס צענטראלע גאס" מעיפל עוו. בטיבורו של עיר, באגלייט מיט פייערדיגע טענץ, בתופים ובמחולות תחת כיפת השמים, אריינפירנדיג דעם ספר תורה בתוככי בית המדרש הגדול.

דער הויכפונקט פון די חגיגה איז געוויס געווען ביי די פלאמעדיגע ריקודי אש קודש בהתלהבות ודביקות, בהתאסף אלפי ישראל ווען כ"ק גאב"ד סאטמאר מאנסי שליט"א פירט אריין די ספר תורה אין ביהמ"ד, אין שמחת תורה'דיגע אטמאספערע, דער היכל הבית המדרש איז געווען איבערגעפילט מיטן פילקעפיגער ציבור זקנים עם נערים וועלכע טוען מיטלעבן די ריקודין עילאין מיט אן אויסטערלישע געהויבענע שמחה והתרוממות.

א באזונדערע התרגשות'דיגע מאמענט איז געווען ווען הגה"צ אב"ד סיגוט שליט"א איז געקומען באשיינען ביי די ריקודין של שמחה אויפ'ן פערזענליכן שליחות הקודש פון מר אביו הגדול כ"ק אדמו"ר מסאטמאר שליט"א, און האט אפגעראכטן א באזונדערע טאנץ מיט די ספר תורה און א ספעציעלער ריקוד מיט דודו כ"ק גאב"ד סאטמאר מאנסי שליט"א.

נאך די געהויבענע ריקודין און אמירת 'לדוד מזמור' פסוק בפסוק, האט נאכגעפאלגט די סעודת מצוה לגומרה של תורה וסעודת שושן פורים מיט רייכע פראגראם אינעם אולם הגדול "עטרת גענענדיל" ד'מוסדות סאטמאר. דער רב שליט"א האט משמיע געווען דברות קודש לכבוד היום, און דברי שבח והודאה, שהחיינו וקימנו והגיענו לזמן הזה אז מען איז זוכה צו אזא דערהויבענע זמן יום שמחת חגיגת התורה. אזוי אויך האט אויפגעטרעטן לכבוד היום דער 'פורים רב' הרה"ג ר' אורי האלברשטאם שליט"א, נאכפאלגענדיג די 'פורים שפיל' דורך טאלאנטפולע שפילער'ס, וועלכע האבן משמח געווען כל הקהל הקודש לכבוד היום.