הערליכע שמחת נישואין בחצר ווערדאן פון ירושלים; פילע חסידים און מערערע אדמורי"ם מיטגעהאלטן די שמחה הרוממה

דינסטאג פ' ראה • כ''ה אב תשפ"ה | בחצרות הקודש

בילדער קרעדיט: דוד ארזני

אין א שמחה'דיגע שטימונג האבן פילע חסידים, מעריצים, געסט, און קרובי המשפחה מיטגעהאלטן די געהויבענער שמחת נישואין במעון הקודש פון כ"ק אדמו"ר מווערדאן שליט"א פון ירושלים, ווען עס איז געגאנגען אונטער די חופה בשעה טובה ומוצלחת דער חתן א זוהן פון רבי'ן, מיט די כלה א טאכטער פון הרה"ג ר' משה לאבין שליט"א רב ביהמ"ד עטרת צבי זידיטשוב אין בני ברק, די חתונה איז געפראוועט געווארן אין דער שטאט בני ברק אויף א גרויסן פארנעם כראוי וכיאות פאר א שמחה בבית צדיקים.

ביים מעמד החופה איז מכובד געווארן מיט סידור קידושין דער גרויסער זיידע פון חתן כ"ק אדמו"ר ממישקאלץ שליט"א, מיט די ברכות ראשונות האט מען מכבד געוועהן די פעטערס, הרה"צ ר' ישראל לייפער שליט"א מווערדאן, הרה"צ ר' שלמה הופשטיין שליט"א, האדמו"ר מלעלוב קארלין און הרה"ג ר' יעקב לאבין שליט"א ראש כולל ש"ס וויזניץ. 

נאכן חופה האט דער אבי החתן האדמו"ר מווערדאן אנגעוואונטשן די משתתפים ביי די שמחה און דאן מכבד געוועהן זיין שווער האדמו"ר ממישקאלץ משמיע צו זיין דברי ברכה בעידן חדוותא, וואס האט נאכגעפאלגט מיט א שיינעם מחול לצדיקים לקול תרועת השמחה.

דורכאויס די סעודת חתונה האבן באשיינט די שמחה מערערע אדמור"ים קרובי המשפחה און פילע רבני עיר בני ברק, אינצווישן זיי: האדמור"ים מדאראג, קרעטשניף ירושלים, פיטסבורג, בישטינא, ביטשקוב, סטריקוב י-ם, קאסאן לעיקוואד, קארלין לעלוב, מיאלען, אנטניא, דינוב ארה"ק, אלעסק ארה"ק, קעכניא, הגה"צ רבי מנחם ארנסטר ראש ישיבת וויזניץ, הגה"צ רבי משה טייטלבוים דומ"ץ סאטמאר ירושלים, הגה"צ רבי חיים הערש מייזליש ראש ישיבת סאטמאר בני ברק, הגה"צ אבד"ק סטריקוב שליט"א, הגה"צ רבי עקיבא סופר אבד"ק ערלוי בני ברק, המשפיע הרה"ג ר' יוסף נחמיה הירשלער שליט"א משפיע ישיבת מיר, הרה"צ רבי יעקב מרדכי האגער אבד"ק וויזניץ אלעד, המשפיע הרה"צ ר' אהרן טויסיג שליט"א, הגה"צ רבי משה נחשוני גאב"ד ראשון לציון, און נאך פיל.

ביים חתונה האט דער רבי שליט"א געטאנצט שעות לאנגע ריקודין צוזאמען מיט די חסידים און גוטע פריינד פון אומעטום, זייענדיג משמח דעם חתן מיט פרייליכע טענץ.

נאכן מצוה טאנץ פונעם זיידן כ"ק אדמו"ר ממישקאלץ שליט"א איז געקומען דער הויכפונקט פון די שמחה — דער מצוה־טאנץ פונעם רבי'ן שליט"א, וואו מ'איז שוין געוועהן געוואוינט אין בית ווערדאן זייענדיג א געוואלדיגע עבודה.

דער בדחן הרב בן ציון ברעכער האט אויסגערופן דעם רבי'ן מיט הערליכע חרוזים, און דערנאך האט די רבי שליט"א אליין אנגעהויבן דעם אויסגעווייקטן "ידיד נפש" וואס זיין פאטער הרה"ק מווערדאן זצוק"ל פלעג זינגען ביי די שמחות במעונו. דערנאך האט דער רבי שליט"א געוואונטשן לחיים פארן גאנצן ציבור און זיך ארויסגעלאזט אין פייערדיגער טענץ בעוז ותעצומות, אויפן ניגון אחד יחיד ומיוחד, כנהוג בבית נאדווערנע.

שפעטער איז דער רבי געטאנצן מיטן חתן און די מחותנים, און דערנאך א ברודערליכע טאנץ מיט אחיו הרה"צ רבי ישראל לייפער שליט"א מווערדאן, וועלכער איז ספעציעל געקומען צו פארן פון אמעריקא צום חתונה.

דער רבי איז דערנאך געטאנצן מיטן גאנצן ציבור, מען האט דאן ממשיך געוועהן די שמחה מיט די מצוה טענץ דורך די מחותנים און קרובי המשפחה.