גרויסן עולם ביי שמחת הנישואין בחצרות ספינקא - טשאקאווא בילדער גאלעריע

דינסטאג פ' לך לך • ו' חשון תשפ"ו | בחצרות הקודש

בילדער קרעדיט: שוקי לרר

א גרויסן ציבור האט די וואך מאנטאג מיטגעהאלטן די רבי'שע חתונה אין שטאט בני ברק פון די חתן א אייניקל ביי כ"ק אדמו"ר מספינקא שליט"א, א זון פון זיין זון הרה"צ ר' אהרן משה ווייס אב"ד ספינקא לאנדאן, איידעם ביי הגה"צ אבד"ק מאקאווא ב"ב זצ"ל, מיט די כלה א טאכטער פון הגה"צ ר' חיים שמואל געשטעטנער שליט"א אבד"ק טשאקאווא, בנו יחידו כ"ק אדמו"ר מטשאקאווא שליט"א, און איידעם ביי כ"ק אדמו"ר מספינקא ירושלים שליט"א, וואס איז פייערליך אפגעראכטן געווארן אין די זאל היכלי מלכות במקהלות עם רב חסידי ואנשי מעשה, בקול צהלה ורינה.

ביים מעמד קבלת פנים האט די זיידע די ספינקא רבי פארגעזינגען דעם ספינקער היה עם פיפיות אויפן נוסח ימים נוראים כנהוג, ביים חופה איז דער רבי שליט''א מכובד געווארן מיט סידור קידושין, מיט קריאת הכתובה די פעטער מצד החתן הגה"צ אב"ד מאקאווא ב"ב שליט''א, ברכות ראשונות די זיידע כ"ק אדמו"ר מטשאקאווא שליט"א, און ברכה אחריתא די זיידע כ"ק אדמו"ר מספינקא ירושלים שליט"א, מען האט פארענדיגט די חופה אום 10:30 אויפדערנאכט.

דורכאויס די שמחת החתונה האבן באשיינט מערערע אדמור"ים ורבנים חשובים, צווישן זיי די פעטער כ"ק גאב"ד מאקאווא שליט"א, האדמורי"ם מאוזרוב, ביטשקוב, ראחוב, ביאלא רמת אהרן, ספינקא רמ"א, גאב"ד רמת שלמה, אב"ד וויזניץ אלעד, הרה"צ רבי אהרן טויסיג, גאב"ד צאנז שיכון ג', אב"ד נאראל, די פעטער'ס האדמורי"ם מביאלא פשיסחא, זוטשקא אמסנא, און גאב"ד מאקאווא אשדוד.

בשעת די ריקודין האט די זיידע די ספינקא רבי שליט"א משמח געווען דעם חתן כדרכו בקודש, והיה מפזז ומרקד מיט א באזונדערע התרגשות נאך וואס דער חתן איז געווען גאר נאנט ביים רבי'ן אלע יאהרן און האט איהם געטריי באדינט די לעצטערע יאהרן בקודש פנימה.

מיטן בענטשן איז מכובד געווארן די פעטער הרה"צ רבי ישכר דוב רוקח בנו הגדול פון האדמו"ר ממאחנובקא בעלזא, די ברכות זענען צוטיילט געווארן צווישן די קרובי המשפחה און ברכה אחריתא הגה"צ רבי חיים צבי שפירא ראב"ד מחזיקי הדת.

נאכן בענטשן האט מען צוגעטראטן צום מצוה טאנץ. צום ערשט האט בדחנא דמלכא ר' מענדיל יאקאב אויפגערופן די זיידע די ספינקא רבי פון ירושלים, דערנאך האט די זיידע די ספינקא רבי פון דונולו אפגעראכטן די ריקודין קדישין בעוז ותעצומות, דערנאך האט מען אויפגערופן די זיידע די טשאקאווא רבי, וועלכע האט בעפארן טאנצן אנגעטון די ירושה גארטיל פונעם שווער כ"ק אדמו"ר בעל 'דברי נפתלי' מטשאקאווא זצ"ל וואס ערהאלט אין זיך פילע חפצי קודש פון צדיקי הדורות הקודמים, און דערנאך פארגעזינגען אילן במה אברכך כמנהג אביו דער בעל להורות נתן. דערנאך האט מען אויסגערופן די חשובע פעטער'ס און מחותנים, מען האט פארענדיגט קרוב צו פיר אזייגער פארטאגס.