שמחת בית צדיקים: שמחת נישואין בבית מחנובקא בעלזא - נחלת אהרן - בערגסאז

מיטוואך פ' בהעלתך • ט''ו סיון תשפ"ה | בחצרות הקודש

חסידי מחנובקא בעלזא האבן נעכטן דינסטאג מיטגעהאלטן דער שמחת נישואין בחצר הקודש, פון החתן א אייניקל ביי כ"ק אדמו"ר ממחנובקא בעלזא שליט"א, א זון פון זיין זון הרה"צ ר' אלטר משה טווערסקי שליט"א אב"ד ראחמיסטריווקא רמה ד' בית שמש, זון פון הרה"צ רבי וועלוול טווערסקי זצ"ל מראחמיסטריווקא, מיט די כלה דער עלטסטער אייניקל ביי כ"ק אדמו"ר מבערגסאז שליט"א, א טאכטער ביי בנו הגדול הרה"צ רבי אביגדור פאללאק שליט"א רב ביהמ"ד קהל חסידים רמה ה' בית שמש איידעם ביי כ"ק אדמו"ר מנחלת אהרן שליט"א.

ביים מעמד החופה איז די זיידע כ"ק אדמו"ר ממאחנובקא בעלזא שליט"א מכובד געווארן מיט סידור קידושין, מיט קריאת הכתובה איז מכובד געווארן די פעטער פון חתן און כלה הגה"צ רבי דוד טווערסקי אב"ד ראחמיסטריווקא, ברכות ראשונות די זיידע כ"ק אדמו"ר מנחלת אהרן שליט"א, די פעטער כ"ק אדמו"ר מיערוסלאב שליט"א, די פעטער כ"ק אדמו"ר מספינקא בני ברק שליט"א, און הרה"צ רבי חיים מאיר טווערסקי בן זקונים פון כ"ק אדמו"ר מסקווירא שליט"א וואס איז ספעציעל געקומען צופארן צו די חתונה בשליחות הקודש, מיט ברכה אחריתא איז מכובד געווארן די זיידע כ"ק אדמו"ר מבערגסאז שליט"א, נאך די חופה האט מען זיך ארויסגעלאזט אין פייערדיגע טענץ לכבוד די שמחה.

אין לויף פון די שמחת החתונה האבן זיך אנגעזעהן האדמורי"ם מסלאנים, וויזניץ בית שמש, זוועהיל, שומרי אמונים, גארליץ, זידיטשוב בני ברק, אנטניא, זידיטשוב ווערצקי, הרה"צ רבי אהרן מרדכי רוקח מבעלזא, אב"ד ערלוי בני ברק, אב"ד שבט הלוי ירושלים, גאב"ד ביליץ, אב"ד סטריקוב, גאב"ד קרית הבעל שם טוב פתח תקווה, די פעטער'ס האדמורי"ם מנדבורנא ירושלים, מבקשי אמונה, ספינקא בני ברק, קאסאני בית שמש, בערגסאז בית שמש, בערגסאז בני ברק, און נאך.

מיטן בענטשן איז מכובד געווארן די פעטער הגה"צ רבי נחמן יוסף טווערסקי אבד"ק זלאטיפאלי וואס איז געקומען צופארן צו די חתונה, די שבע ברכות איז צוטיילט געווארן צווישן די פעטער'ס האדמורי"ם מנדבורנא ירושלים, בערגסאז בית שמש, בערגסאז בני ברק, און ברכה אחריתא האדמו"ר מקאסאני בית שמש.

נאכן בענטשן האט זיך די ציבור ארויסגעלאזט אין ריקודים של שמחה, ווי מען האט זיך משמח געווען בשמחת חתן וכלה, במשך די ריקודין איז די גאנצע ציבור דורך ביים רבין שליט"א און די מחותנים וואונטשן מזל טוב. 

כחצות הלילה האט מען צוגעטרעטן צום מצווה טאנץ, צום ערשט זענען געטאנצן די זיידע'ס האדמורי"ם שליט"א, דערנאך די פעטער פון חתן כלה הגה"צ רבי דוד טווערסקי אב"ד ראחמיסטריווקא, דערנאך די פעטער'ס קינדער פונעם זיידן הרה"צ רבי וועלוול טווערסקי זצ"ל, די פעטער'ס האדמורי"ם והרבנים לבית בערגסאז און די מחותנים, און דאן האט די מאחנובקא בעלזא רבי שליט"א אפגעראכטן די ריקודין קדישין לפני הכלה מיט גרויס התלהבות, און באזונדער ארויס אין פייערדיגע ריקודין מיט שארי בשרו הרה"צ רבי אהרן מרדכי רוקח מבעלזא און הרה"צ רבי חיים מאיר טווערסקי מסקווירא, עס איז שוין געוועהן אין א שפעטע שעה נאך 2:30 ווען מען האט פארענדיגט די חתונה הרוממה.