שמחה כפולה ביים מעמד חנוכת הבית פאר נייע בנין התלמוד תורה אין ישיבה לצעירים דחסידי באיאן אין מודיעין

דאנערשטאג פ' שופטים - ל' אב תשפ"ג | קול בחצרות

חסידי באיאן אין שטאט מודיעין עילית האבן מיט התרגשות מקבל געוועהן את פני הקודש פון דער מנהיג העדה כ"ק אדמו"ר מבאיאן שליט"א וואס איז אנגעקומען נעכטן מיטוואך אויף א ביקור קודש בקרב הקהילה.

די רבי שליט''א איז געקומען צו פארן לרגל די שמחה כפולה ומכופלת, די מעמד חנוכת הבית פאר א נייעם בנין רחבת ידיים פארן תלמוד תורה 'תפארת מרדכי שלמה' באיאן וואס וועט אויך דינען אלס אכסניא של תורה פאר די נייע ישיבה לצעירים דחסידי באיאן, דער נייע בנין המוסדות וואס איז אויפגעבויעט געווארן אין די גרין פארק געגענט איז אין די יעצטיגע תקופה פארענדיגט געווארן ברוב פאר והדר לשמחת לבם פון חסידי באיאן אלוועלטליך און בפרט די פילע חסידים וועלכע האבן אין די לעצטערע יאהרן קובע משכנם געווען אין דער שטאט מודיעין.

די רבי שליט"א איז ביים אנקומען אין שטאט צום ערשטנס אנגעקומען אויף א באזוך בהיכל הישיבה גדולה אין מודיעין עילית און געדאווענט תפילת מנחה אינאיינעם מיט די בחורי חמד נאכגעפאלגט מיט תפילת יום כיפור קטן לרגל ערב ראש חודש אלול , פון דארט איז די רבי אנגעקומען צום נייעם בנין גדול ומפואר ווי עס איז פארגעקומען די מעמד קביעת מזוזות און פתיחת שערים פאר די נייע תלמוד תורה און די נייע ישיבה קטנה לשם ולתהלה, נאכגעפאלגט מיט די געהויבענע מעמד חנוכת הבית ברוב שמחה וגיל אינעם דערנעבנדיגן אודיטוריום מיט די באטייליגונג פון הונדערטער חסידים תושבי העיר וואס האבן מיטגעהאלטן דעם מעמד ההוד.