גלה כבוד מישראל: הגה"צ חו"פ רבי מרדכי הכהן בעק זצ"ל ראש ישיבת תפארת משה נפטר געווארן

דינסטאג פ' דברים • כ''ט תמוז תשפ"ו | בחצרות הקודש

מיט גרויס צער און באדויער ווערט אויפגענומען די ביטערע בשורה איבער די פלוצלינג'דיגע פטירה פון דעם גרויסן גאון ומרביץ תורה, הגה"צ חו"פ רבי מרדכי הכהן בעק זצ"ל, ראש ישיבת תפארת משה ואבד"ק סגולת ישראל אין מאנסי, וועלכער איז נפטר געווארן היינט אינדערפרי אין עלטער פון 80 יאר, נאכן ליידן פון א מאסיווע הארץ-אטאקע זייענדיג אויפ'ן וועג אין ישיבה.

דער ראש הישיבה זצ"ל איז געווען באקאנט מיט זיין געוואלדיגע התמדה וגאונות בתורה, זיין עבודת ה' און זיין איבערגעגעבנקייט פאר יעדן תלמיד. ער האט געהארעוועט אין תורה פון יונגערהייט, גרייכנדיג צו יחוס עצמו אויף א געוואלדיגן פארנעם אין אלע הינזיכטן, ושמו הטוב הלך לפניו אלע יארן כולן שוין לטובה.

דער ראש ישיבה איז געבוירן געווארן אין יאר תש"ו אין פרעשבורג, סלאוואקיי, און איז געווען פון דער ערשטער דור נאך די מלחמה. זיין פאטער הרה"ח ר' יודל בעק ז"ל מחשובי חסידי מונקאטש, האט זיך דאן אריבערגעצויגן קיין מאנטרעאל, קאנאדע, וואו ער האט פארברענגט זיינע יונגע יארן.

בימי בחרותו האט ער געלערנט אין די בארימטע ישיבות פון נייטרא, לעיקוואוד און בריסק, וואו ער איז געשטיגן מעלה מעלה אונטער די געהויבענע שאטן פון זיינע גרויסע רביים.

דער ראש הישיבה זצ"ל איז געווען פון די סאמע חשוב'סטע תלמידים פונעם בריסקער ראש הישיבה הגאון האדיר רבי בערל סאלאווייטשיק זצ"ל און באזונדער האט ער געלערנט בחברותא מיט זיין זון יבלחט"א דער היינטיגער בריסקער ראש הישיבה הגאון הגדול רבי אברהם יהושע סאלאווייטשיק שליט"א.

נאך די חתונה מיט זיין חשובע רעבעצין שתחי', דער טאכטער פון הרה"ח ר' הערש אלימלך כהנא ז"ל מחשובי חסידי סאטמאר, האט ער געדינט אלס מגיד שיעור אין ישיבת נייטרא, און שפעטער אין יאר תשנ"א האט ער געגרינדעט זיין אייגענע ישיבה "תפארת משה" אין מאנסי, אויפן אלטן פארצייטישן שטייגער ווי די ישיבות אין דער אלטער היים, וואו ער האט אויפגעשטעלט טויזענטער תלמידים נאמנים, פארגעלערנט שיעורים בכל חדרי התורה, און געווען א מוסטער פאר די תלמידים מיט זיין געוואלדיגע התמדת התורה און בקיאות בתורה.

ער האט פארמאגט אן אייגנארטיגע מהלך הלימוד און טייל פון זיינע טיפזיניגע שיעורים אין די מסכתות הש"ס זענען געדרוקט אין די ספרים "פרשת מרדכי".

דער ראש הישיבה איז געווען באקאנט מיט זיין געוואלדיגע עבודת התפילה בהשתפכות הנפש, און פילע אידן קומען זיך ווארעמען ביי די תפילות וואס ער פלעג פארדאווענען פארן עמוד מיט זיין קול מעורר, במיוחד אין די ימים הנוראים.

דערצו האט ער כסדר געפילעוועט אין זיינע דרשות מיט קלארע רייד די ריינע השקפה וואס ער האט מקבל געווען פון מרן הרה"ק מסאטמאר זי"ע, און מיט זיין רייכע לשון לימודים און פה מפיק מרגליות איז ער געווען די ראש המדברים ביי מערערע כינוסים און אסיפות להעמיד הדת על תילה, אין פילע געלעגנהייטן.

ווי דערמאנט, איז ער אוועקגעפאלן פון א שווערע הארץ-אטאקע ביים אנקומען אין ישיבה היינטיגן דינסטאג אינדערפרי, הצלה האבן געארבעט צוריקצוברענגען דעם ראש הישיבה אבער ליידער האט ער אויפן פלאץ אויסגעהויכט זיין נשמה איבערלאזנדיג זיין חשובע משפחה און טויזנטער תלמידים איבער די וועלט צובראכן און צושאסן.

די לויה וועט פארקומען היינט נאכמיטאג בהיכל הישיבה אויף קאלעדזש ראוד אין מאנסי אויפן וועג קיין קרית יואל וואו ער וועט קומען לקבורה.

יהי זכרו ברוך.