היסטארישע מעמד מסירת מתנות כהונה דורך האד' מסאטמאר וועט אפגעראכטן ווערן חוה"מ פסח אין ביהמ"ד הגדול דקרית יואל

מיטוואך פ' צו • ז' ניסן תשפ"ו | בחצרות הקודש

תלמידי וחסידי סאטמאר זענען איינגעהילט אין א זעלטענעם עקסטאז און התרגשות, זיך גרייטנדיג מיטצולעבן דעם מעמד נהדר ומרומם פון מסירת מתנות כהונה, וואס וועט אפגעראכטן ווערן ברוב פאר והדר דעם קומעדיגן מאנטאג ג' דחול המועד פסח הבעל"ט, דורכ'ן רועה ישראל כ"ק אדמו"ר מסאטמאר שליט"א, ברוב עם הדרת מלך ובשמחה של מצוה, אינעם היכל ביהמ"ד הגדול אין קרית יואל.

דער מעמד מסירת מתנות כהונה וועט זיין דער הויכפונקט פונעם יום טוב, ווען קהלא קדישא אלופי אלפי חסידי סאטמאר, זקנים עם נערים, רבנים, מורי הוראה, בעלי בתים און אברכים פון אלע געגנטער וועלן זיך פאראייניגן תחת קורת גג אחד מיצוהאלטן דעם מצוות עשה דאורייתא בכל פרטיה ודקדוקיה.

אנהייב פונעם מעמד וועט אפגעראכטן ווערן אן אייגנארטיגער "מעמד הפיסות", וואס וועט דינען אלס א פתיחתא צום עיקר קיום המצוה, וואו מען וועט פראקטיש דורכפירן דעם סדר פונעם "פיס" – די גורל פראצעדור וואס איז גענוצט געווארן בזמן שבית המקדש היה קיים צו באשטימען וועלכע כהנים זאלן זוכה זיין צו די עבודה.  

אינעם גורל וועלן אנטייל נעמען די כהנים מובחרים פארי וזקני עדת חסידי סאטמאר מרחבי ניו יארק חברי אהבת קדומים, און די כהנים החשובים יושבי אהלה של תורה אין די כוללי תורה ויראה דסאטמאר, די גורל וועט אנגעפירט ווערן דורכ'ן כהן הממונה אחד מנכבדי הכהנים המיוחסים בתוככי הקהילה, ווען די כהנים הנבחרים זוכים בפייס וועלן זוכה זיין לעלות על שולחן מלכים צו באקומען די מתנות כהונה מידי קדשו פונעם רבי'ן שליט"א.

דערביי וועט דער ציבור האבן די זעלטענע געלעגענהייט מיטצולעבן די מצווה פון נתינת זרוע, לחיים, והקיבה פאר די כהנים וואס וועלן עולה זיין בגורל, אפגעראכטן ככל משפטו וחוקתו דורך כ"ק אדמו"ר מסאטמאר שליט"א.  

דער גאנצער היכל ביהמ"ד הגדול וועט ווערן אויסגעשטעלט אויף א מייסטערהאפטיגן פארנעם צו קענען אקאמאדירן די טויזנטער חסידים פון איבער גרעיטער ניו יארק, און אין צענטער פון ביהמ"ד וועט זיין א מקום מיוחד ומכובד מיט ספעציעלע זיצן פאר די כהנים חברי אהבת קדומים און רבני הכוללים וועלכע וועלן זיין א חלק פונעם פייס, ווי פון דארט וועט פארקומען די מעמד הפייסות.

אין די לעצט פארבליבענע טעג צום יום טוב, ווערן אויסגעארבעט אלע דעטאלן ארום די היסטארישע מעמד וועלכע וועט אפגעהאלטן ווערן אויף א גרויסן פארנעם במקהלות עם רב, בשמחה של מצוה, מיט א הארציגע תפילה "והשב כהנים לעבודתם ולויים לשירם ולזמרם", האפענדיג בקרוב זוכה צו זיין מקיים צו זיין אלע כ"ד מתנות כהונה בביאת משיח צדקינו.