קִיְּמוּ וְקִבְּלוּ • ימי הפורים בחצר הקודש צאנז קלויזענבורג

דינסטאג פ' ויקהל • י"ח אדר תשפ"ה | בחצרות הקודש

בילדער קרעדיט: אחים לאנטשעווסקי

חסידי צאנז קלויזנבורג האבן מיטגעלעבט א הערליכע יום טוב פורים בצל הקודש. ליל ויום פורים האט דער רבי שליט"א געליינט די מגילה כנהוג, במתינות כדרכו בקודש. פרייטאג ביום הפורים איז דער רבי שליט"א אריינגעקומען צום דאווענען אינעם בית תפילה בביתו נאווה קודש וואו ער האט יורד געוועהן לפני התיבה און - שלא כהרגלו געדינט אלס בעל קורא ביים ליינען. דאס דאווענען האט זיך פארצויגן קרוב צו פיר שעה בהשתפכות הנפש. נאכן דאווענען האט דער רבי פארטיילט משלות מנות פאר די מתפללים אינעם מנין קבוע.

מחמת כבוד שבת האט דער רבי נישט געטרינקען וויין ביים משתה היין ערב שבת נאכמיטאג. ביים קורצן טיש וואס האט געדויערט אריבער א שעה צייט האט דער רבי משמיע געוועהן דברי תורה מעניני דיומא און געוואונטשן לחיים.

ווי דער שטייגער אין קלויזנבורג טוען די חסידים איבערגעבן נייע ספרים אלס משלוח מנות פארן רבי'ן, זונטאג שושן פורים איז געוועהן צו פארקויפן אלע ערליי ספרים אינעם ביהמ''ד שע''י ביתו נאווה קודש און אנגעהויבן פון די פריע נאכמיטאג שעהן האבן זיך הונדערטער חסידים געשלענגערט אין די רייען איבערצוגעבן די משלוח מנות און זיך מזכיר זיין להיפקד בדבר ישועה ורחמים.

שפעטער ביים שושן פורים טיש אין גרויסן ביהמ"ד זענען ארויף על שולחן מלכים, הרה"ג ר' שמואל שמעלקא שווארטץ רב שכונת סטעמפארד מעדאוס אין לעיקוואד וועלכער האט געזאגט דעם פורים פשעטיל כנהוג, הרה"ח ר' חיים יעקב דייטש הי"ו וועלכער האט אויפגעטרעטן מיט דברי בדחנות, אין הרה"ח ר' אביגדר דייטש הי"ו וועלכער האט אויפגעטרעטן מיט דברי חרוזים לכבוד די מגבית קמחא דםסחא, און דער בדחן ר' נחמן ליווי הי"ו וועלכער האט משמח געוועהן מיט פרייליכע ווערטלעך לכבוד היום. בשעתן טיש האבן מהנה געוועהן בשירה וזמרה דער בעל מנגן ר' אביש בראדט ובניו, און כמידי שנה בשנה איז אויסגערופן געווארן אן אפיעל פארן רבינס קמחא דפסחא קאסע לקראת חג הפסח הבעל"ט.

ביים בענטשן האט דער רבי געזאגט די שבע ברכות לכבוד עטליכע חתנים פון די קהילה, צווישן זיי דער חתן פונעם משמש בקודש הרה"ח ר' ישראל יוסף פרערויא הי"ו. נאכן טיש איז דער גאנצער ציבור דורך אל מול פני הקודש, לברך ולהתברך.