מאנטאג פ' וישלח • ח' כסלו תשפ"ה | בחצרות הקודש
בילדער קרעדיט: הילל ל"ש
בקול רנה וישועה איז בשמחה וצהלה דעם דינסטאג אפגעראכטן געווארן די פייערליכע שמחת הנישואין פון אן אייניקל ביי כ"ק אדמו"ר מבאבוב-45 שליט"א, מיט'ן השתתפות פון א גרויסן ציבור חסידים וועלכע האבן זוכה געווען מיטצוהאלטן די געהויבענע שעה'ן פון שמחת בית צדיקים וואס איז פארגעקומען אינעם ביהמ"ד הגדול באבוב-45 אין בארא פארק.
דער חתן איז א זון פון חדב"ן הרה"צ ר' חיים ברוך האלבערשטאם שליט"א, בן הגה"צ אבד"ק פאקשעוויץ שליט"א מיט די כלה א טאכטער פון הגה"צ ר' חיים אלי' טייטלבוים שליט"א אב"ד קאריץ.
ביום החופה האט דער רבי שליט"א משמיע געווען די ברכת הקודש פאר די הונדערטער חסידי באבוב- 45 פון לאנדאן און ארץ ישראל, וועלכע זענען זיך צאמגעקומען אויף א מסיבת מרעים לרגל די חתונה ביים רבי'ן אין הויף.
ביים קבלת פנים האט מען געזינגען ניגוני התעוררות פון צדיקי בית באבוב, און מ'האט געהערט דברי כיבושין פון הרה"ג ר' משה יוסף האלבערשטאם. הגה"צ אבד"ק באבוב-45 שליט"א האט מסדר געווען די כתובה, און דער רבי האט אריינגעפירט צום באדעקן, און דאן מלביש געווען דעם חתן מיט'ן קיטל און מיט'ן הייליגן ירושה-קאפל פון הרה"ק מצאנז און פון שינאווא זכותם יגן עלינו.
דערנאך איז מען ארויס צו די חופה וואס איז פארגעקומען פארנט פון ביהמ"ד הגדול. ביים מעמד החופה איז מכובד געווען מיט סידור קידושין דער עלטער-פעטער הגה"צ אבד"ק באבוב-45, קריאת הכתובה דער זיידע פון די כלה הרה"ג ר' מרדכי מענדל שווארץ שליט"א ראה"כ בראד, מיט די ברכות ראשונות הגה"צ פאקשעוויצער רב, דער זיידע הגה"צ רבי מנחם מאיר טייטלבוים שליט"א, האדמו"ר מזוועהיל מאנסי, הגה"צ בראדער רב שליט"א, און מיט ברכה אחריתא דער רבי שליט"א.
דער רבי שליט"א האט משמיע געווען די ברכת הקודש, ואמר כל העם אמן, און זיך ארויסגעלאזט אין פייערליכע טענץ בשעת די זיידעס און מחותנים לאזן זיך ארויס אין א פייערדיגע מחול לצדיקים. ביי די חופה האט זיך אויך משתתף געווען די פעטער כ"ק אדמו"ר מראחמיסטריווקא שליט"א.
שפעטער איז דער רבי שליט"א ערשינען צו די שמחת החתונה, לקול תרועת השמחה פון די אלפי החסידים וועלכע האבן מיטגעלעבט פריידיגע שעה'ן פון שמחה דקדושה, ספעציעל האט די שמחה גובר געווען ווען מ'האט געזינגען די ניגוני קודש וואס דער רבי שליט"א האט מחבר געווען.
במשך די חתונה האבן זיך משתתף געווען מערערע אדמורי"ם ורבנים, און ס'איז פארגעקומען א ספעציעלער ריקוד מיט האדמו"ר מראחמיסטריווקא שליט"א.
מיט'ן בענטשן איז נתכבד געווארן דער זיידע אבד"ק בית אברהם שליט"א, און דערנאך איז פארגעקומען דער "קאזאקן טאנץ" כנהוג, און דערנאך האט מען צוגעטרעטן צו די געהויבענע מצוה-טאנץ, ווען הרה"ג ר' צבי ארי' ריינהאלד האט אויפגערופן דעם רבי'ן צו די ריקודין לפני הכלה, איידער'ן טאנצן האט דער רבי געהייסן זינגען דעם הייליגן ניגון דביקות פון הרה"ק רבי מיכל'ע זלאטשוב'ער, און דאן זיך אריינגעלאזט אין די געהויבענע פלאם פייערדיגע ריקודין לפני הכלה, וינועו אמות הסיפים.
דערנאך איז די חתונה נמשך געווען מיט די מצוה-טענץ פון די געהויבענע זיידעס און מחותנים און חתן-כלה, די חתונה איז פארענדיגט געווארן אום 3 אזייגער מיט'ן געהויבענעם ריקוד "אין כאלקינו" כמנהג צאנז, וואס דער רבי שליט"א האט פארגעזאגט בנעימות ודביקות.
Comments