דאנערשטאג פ' קדושים • א' אייר תשפ"ד | בחצרות הקודש
בילדער קרעדיט: אבי סורקיס און יוסי גאלדבערגער
דעם פארגאנגענעם דינסטאג קדושים לס' ואבת לרעך כמוך אני ה', איז פארגעקומען דעם גרויסארטיגן היסטארישן "כינוס להחיות", וואו חסידי סקווירא האבן אינאיינעם געגרינדעט און אוועקגעשטעלט דעם העכסט-וויכטיגן קרן להחיות דחסידי סקווירא, מקדים צו זיין די רפואה למכה - אין פאל וואס עס זאל זיך חלילה נישט מאכן ח"ו, מיט'ן פאראייניגן א באזע פון אלפי חסידי סקווירא ברחבי ארה"ב וקאנאדא, וועלכע זענען זיך מתחייב צו שענקען א באשטימטע סומע פאר יעדן יתום ויתומה ח"ו, און אזוי ארום אויב עס מאכט זיך ה"י אז מען דארף שטעלן א קרן פאר א משפחה איז תיכף דא דאס גאנצע פארלאנגטע געלט און עס פעלט בעז"ה מער נישט אויס צו מאכן קיין ספעציעלן קרן יתומים קאמפיין מיט די אומאנגענעמע געפילן פאר די באטראפענע משפחה.
ביים מעמד וואס איז פארגעקומען אין גרויסן ביהמ"ד ד'שיכון סקווירא בראשות הרבנים הגאונים הצדיקים בני כ"ק האדמו"ר מסקווירא שליט"א איז געהערט געווארן א ספעציעלע "ברכת בקודש" פונעם רבי'ן שליט"א, איבערגעגעבן דורך הרב הגאון ר' יוסף ישראל אייזענבערגער שליט"א דומ"ץ שיכון סקווירא, די "דבר המפעל" דורך הרב הגאון ר' אברהם שפיטצער – דומ"ץ סקווירא אין לעיקוואד, און רב קרן "להחיות". דערנאך די צענטראלע אויפטריט דורך די יו"ר המעמד הרב ר' אברהם יוסף גארדאן שליט"א – מיט א קורצע פאנעל אינאיינעם מיט הרב ר' אפרים בארנשטיין יושב ראש ארגון "הבן יקיר" אין ק"ק באבוב.
דערנאך האבן זיך די הונדעטער משתתפים אנגעשלאסן אלס מעמבער'ס אין דעם נייעם קרן "להחיות", ווי מען האט געהערט ביי די "ברכת הקודש" די גרויסקייט און סגולה פון 'אריכות ימים' און 'שמירה' פאר אלע משתתפים 'להחיות' בהם נפש כל חי.
אין די קומענדיגע חדשים וועלן פארקומען מעמדים איבער אלע סקווירא צענטערן ברחבי ארה"ב וקאנאדא אנצושליסן אלפי חסידי סקווירא און צו קענען געבן די געלגענהייט פאר יעדעם איינעם צו זיין בכלל הברכה החיים והשלום.
