תושבי קרית קאשוי באגלייטן למנוחות הגה"צ רבי יוסף יהושע העשיל בלום זצ"ל גאב"ד קרית קאשוי

דאנערשטאג פ' ויקרא • א' ניסן תשפ"ו | בחצרות הקודש

הונדערטער אידן איינוואוינער פון קרית קאשוי און תלמידי ומעריצים האבן דעם דינסטאג באגלייט למנוחת עולמים אחר מיטתו פון הגה"צ חסידא ופרישא רבי יוסף יהושע העשיל בלום זצ"ל גאב"ד קרית קאשוי וועלכער איז נתבקש געווארן לישיבה של מעלה לדאבון לב תלמידי בית קאשוי אומעטום וכל בית ישראל.

אום דריי אזייגער נאכמיטאג איז די מיטה אריינגעפירט געווארן אין ביהמ"ד הגדול אין קרית קאשוי וואו עס זענען געהערט געווארן א רייע הספדים, דברי קינה ונהי צום ערשט פון די חשובע ברודער הגה"צ רבי שמואל מאיר בלום שליט"א פון קרית קאשוי, הגה"צ רבי משה מנחם בלום שליט"א, כ"ק אדמו"ר מקאשוי שליט"א, כ"ק אדמו"ר מתולדות רפאל קאשוי שליט"א, הגה"צ אבד"ק קאשוי וויליאמסבורג שליט"א, און די שוואגערס הגה"צ גאב"ד יעמרינג שליט"א און הגה"צ רבי יוסף משה פריעדמאן אב"ד סוואליעווע.

דערנאך זענען ווייטער געהערט געווארן הספדים פון די חשובע רבנים כ"ק אדמו"ר מנייטרא שליט"א, הגה"צ רבי הלל וויינבערגער אבד"ק סערדאהעלי ודומ"ץ נייטרא, הגה"צ אבד"ק בית שמואל שליט"א, און בשם הקהילה הרה"ג רבי עמרם אילאוויטש שליט"א פון די חשובע תושבים אין קרית קאשוי.

אלע מספידים האבן פה אחד באוויינט די אבידה שאין לה תמורה און ארויסגעברענגט געהויבענע שטריכן פונעם רב זצ"ל, פון זיין געוואלדיגע גאונות און הרבצת התורה והוראה, יראת שמים און פרישות, און ווי ער איז געווען אן ענוותן ושפל ברך, און א  נח לשמים ולבריות.

נאך די הספדים האבן פילע אידן באגלייט דעם ארון ברחובות קריה אין שפיץ פון חשובע אדמורי"ם ורבנים, צווישן אנדערע האדמורי"ם מוויזניץ מאנסי, זידיטשוב פרעמיסלא, נייטרא, אב"ד בארדיטשוב, אב"ד סערדעהאלי ודומ"ץ נייטרא, אב"ד טוב לבב, אב"ד בית שמואל, אב"ד בית הלל, אב"ד פנים מאירות סיקסא, אב"ד אור לשמים אפטא, און נאך חשובע רבנים און קרובי המשפחה.

מען האט באגלייט דעם ארון צופיסנס ביז צום בית החיים וואו דער רב זצ"ל איז געקומען לקבורה אינעם אוהל הקדוש פון אביו הגה"ק בעל ברכות שמים מקאשוי זצ"ל, הארט נעבן אחיו הגדול כ"ק אדמו"ר מקאשוי זצ"ל בעל שיח חיים.