וּבְחוּצוֹת יְרוּשָׁלַיִם: געהויבענער רבישע חתונה בחצרות סאדיגורא ירושלים - מודזיץ - בערטש

מאנטאג פ' וישלח • י''א כסלו תשפ"ו | בחצרות הקודש

בילדער קרעדיט: יוהשע פרוכטער

ברגשי שמחה והתעלות האבן פילע חסידים מיטגעהאלטן די געהויבענע רבישע חתונה פון די כלה א טאכטער פון כ"ק אדמו"ר מסאדיגורא ירושלים שליט"א איידעם ביי כ"ק אדמו"ר מבאסטאן שליט"א, מיט די חתן א זון פון הגה"צ ר' צבי אלימלך רוקח שליט"א אבד"ק בערטש פלעטבוש, איידעם ביי כ"ק אדמו"ר ממאדזיץ שליט"א פון פלעטבוש, וואס איז אפגעראכטן געווארן בשמחה וגיל וברוב פאר והדר אין די זאלן פון בניני האומה אין ירושלים.

עס האט זיך אנגעזעהן א שיינעם ציבור געסט מעבר לים חסידים ומעריצים פונעם סאדיגורא הויף, ובראשם די חשובע פעטערס כ"ק אדמו"ר מסאדיגורא לאנדאן שליט"א ואחיו וגיסיו הרבנים קינדער פון כ"ק אדמו"ר מסאדיגורא זצ"ל, הגה"צ אב"ד טשארטקוב לאנדאן שליט"א, און הרה"צ רבי דוב בער פריעדמאן מטשארטקוב אנטווערפען.

ביים מעמד קבלת פנים איז געזינגען געווארן ניגוני התעוררות כנהוג, און דברי חרוזין דורך הרה"ח ר' חיים ברוך איזראעלי הי"ו לעורר הלבבות. ביי די מעמד החופה איז מכובד געווארן מיט סידור קידושין די זיידע מצד החתן כ''ק אדמו"ר ממאדזיץ פלעטבוש שליט''א, עדי קידושין הגאון רבי יקותיאל ליבערמאן אבד"ק סאדיגורא ירושלים, און הגאון רבי אהרן גאלדמינצער דומ"ץ סקווירא ירושלים, קריאת הכתובה הגה"צ אבד"ק טשארטקוב לאנדאן שליט"א, ברכות ראשונות הגה"צ ראש ישיבת טשעבין שליט"א, די פעטער כ"ק אדמו"ר מסאדיגורא לאנדאן שליט"א, און נאך קרובי המשפחה, ברכה אחריתה די זיידע מצד הכלה כ"ק אדמו"ר מבאסטאן שליט"א, נאכן חופה האבן די זיידעס האדמורי"ם שליט"א, און די רבי שליט"א אבי הכלה אנגעוואונטשן מברכותם לכל העם הנאספים, און זיך ארויסגעלאזט אין א פייערדיגע מחול לצדיקים.

צום באשטימטן צייט זענען די אדמו''רים שליט''א ערשינען צום סעודת החתונה אינעם זאל ווערנדיג אנטפאנגען לקול תרועת השמחה, דורכאויס די שמחה האבן באשיינט דעם אויבן אן פילצאליגע אדמורי"ם ורבנים ובראשם האדמורי"ם לבית רוזין; האדמורי"ם מבאיאן, קאפיטשניץ, וואסלוי, און האדמורי"ם מוויזניץ, מאחנובקא בעלזא, ביאלא, מודזיץ, פינסק קארלין, נדבורנא ירושלים, סקולען ירושלים, טאלנא פון אשדוד, קאסוב וויזניץ, סטראפקוב, טריסק, ספינקא בית שמש, הרה"צ המשפיע רבי אלימלך בידערמאן מלעלוב, הרה"צ רבי אהרן מרדכי רוקח מבעלזא, הגה"צ רבי משה בראנסדארפער גאב"ד היכל הוראה, הגאון רבי צבי בראווערמאן ראב"ד ביתר, און הרה"צ רבי יצחק אבוחצירא שליט"א.

בשעת די ריקודין איז דער מחותן האדמו"ר מסאדיגורא ירושלים אראפגעגאנגען טאנצן אין צענטער פונעם זאל און זיך ארויסגעלאזט אין ריקודין נלהבין מיט די משפחת המלוכה אחים רעים האהובים, באזונדער איז די רבי געטאנצן מיט כ"ק אדמו"ר מוויזניץ שליט"א, און מיט כ"ק אדמו"ר מסקולען ירושלים שליט"א.

נאכן בענטשן און שבע ברכות האט בדחנא דמלכא ר' בן ציון טאבאק הי"ו אויפגערופן די געהויבענע זיידעס האדמורי"ם שליט"א צו די ריקודין של מצווה, און דערנאך האט הנגיד רבי אהרן נאה הי"ו פון ניו יארק גענומען דאס ווארט און מיט פאסיגע דברי חרוזין אויסגערופן דעם רבי'ן אבי הכלה צו די עבודת הריקודין וואס די רבי שליט"א האט אפגעראכטן מיט אן התלהבות דקדושה טאנצנדיג מיט די ייחודים און כוונות בדרך אבותיו הקדושים. דערנאך זענען געטאנצן די פעטערס לבית סאדיגורא, און מען האט דערנאך ממשיך געווען מיט די ריקודין פון די מחותן אבי החתן, און די אנדערע קרובי המשפחה.

די שיינע שמחה האט נאכגעפאלגט מיט א געהויבענע שבת של שמחה די שבת שבע ברכות וואס איז אפגעראכטן געווארן אינעם סאדיגורא-ירושלימער הויף, מיט די השתתפות פון פילצאליגע חסידים ומעריצים, ובראשם די געהויבענע זיידעס האדמורי"ם שליט"א מצד החתן והכלה, און די חשובע געסט, ווי די אדמור"ים שליט"א האבן במשך דעם שבת של שמחה אפגעראכטן די שולחנות הטהורים אינאיינעם לכבוד די שמחה.