הערליכע שמחת נישואין בחצרות ספינקא - עבודת הלב ליעזש - טשאקאווא

מיטוואך פ' מטות מסעי • כ"ה תמוז תשפ"ד | בחצרות הקודש‎

בילדער קרעדיט: יהושע פרוכטר

א גרויסן ציבור האט פאריגע וואך מיטגעהאלטן די רבי'שע חתונה אין עיה"ק ירושלים פון החתן אייניקל ביי כ"ק אדמו"ר מספינקא שליט"א, זון פון זיין זון הרה"צ רבי יחיאל יהושע ווייס שליט"א איידעם ביי הגה"צ אב"ד מאקאווא אשדוד שליט"א, מיט די כלה א טאכטער פון הגה"צ רבי יעקב יצחק אלעזר מייזליש אבד"ק עבודת הלב ליעזש איידעם ביי כ"ק אדמו"ר מטשאקאווא שליט"א, וואס איז פייערליך אפגעראכטן געווארן אין די מאנדיאל זאל אין ירושלים במקהלות עם רב חסידי ואנשי מעשה.

ביים מעמד קבלת פנים האט די זיידע די ספינקא רבי פארגעזינגען היה עם פיפיות אויפן נוסח ימים נוראים כנהוג, ביים חופה איז מכובד געווארן מיט סידור קידושין די זיידע הגה"צ אב"ד מאקאווא אשדוד שליט"א, מיט קריאת הכתובה די פעטער מצד הכלה הגה"צ אב"ד טשארטקוב לאנדאן, מיט די ברכות זענען נתכבד געווארן די עלטער פעטער'ס מצד החתן הגה"צ רבי יצחק שלום שיינפעלד מקאסאן ירושלים, הגה"צ רבי שמחה ראבינאוויטש בעל פסקי תשובות, הרה"צ רבי פנחס ראבינאוויטש, הגה"צ אב"ד ליעזש לאנדאן פעטער מצד הכלה, און הרה"צ רבי ברוך האגער בן כ"ק אדמו"ר מסערט וויזניץ מחותן מצד הכלה, ברכה אחריתא די זיידע כ"ק אדמו"ר מטשאקאווא שליט"א

דורכאויס די שמחה האבן באשיינט בראש המסובים פילצאיגע אדמור"ים ורבנים חשובים, צווישן זיי האדמור"ים מקארלין סטאלין, סערט וויזניץ, זוועהיל, לויצק, נדבורנא ביתר, שידלובצא, ספינקא ירושלים, ספינקא רמ"א, ספינקא גני גד, כ"ק גאב"ד מאקאווא שליט"א, הגה"צ אב"ד סאטמאר ירושלים, הרה"צ רבי אהרן מרדכי רוקח מבעלזא, הגה"צ רבי צבי מאיר זילבערבערג ראש חבורת נחלת יעקב, גאב"ד קרית צאנז ירושלים, גאב"ד רמת שלמה, אין נאך פיל. 

נאכן בענטשן האט מען צוגעטראטן צום מצוה טאנץ. צום ערשט איז געטאנצן לפני הכלה די מחותן אב"ד עבודת הלב ליעזש, דערנאך די זיידע די טשאקאווא רבי, פארן טאנץ האט די טשאקאווא רבי אנגעטון די ירושה גארטיל פונעם שווער כ"ק אדמו"ר בעל 'דברי נפתלי' מטשאקאווא זצ"ל וואס ערהאלט אין זיך פילע חפצי קודש פון צדיקי הדורות הקודמים, און דערנאך פארגעזינגען אילן במה אברכך כמנהג אביו די בעל להורות נתן. דערנאך האט די זיידע כ"ק אדמו"ר מספינקא שליט"א האט פארגעזינגען אלקא דיליה און נאך ניגונים מיט גרויס דבקות און דאן אפגעראכטן די ריקודין של מצווה בעוז ותעצומות.