הערליכע הכנסת ספר תורה צום היכל הכולל אין קרית צאנז אריינגעגעבן דורך ספרדישע תושב נתני'

דאנערשטאג פ' בא • א' שבט תשפ"ה | בחצרות הקודש‎

בילדער קרעידט: משה גולדשטיין

בחצר הקודש צאנז איז פאריגע וואך אפגעראכטן געווארן א מעמד הכנסת ספר תורה צום היכל הכולל אין קרית מלך רב קרית צאנז נתני' וואס איז אריינגעגעבן געווארן בנדבת לבו פון מוה"ר נתנאל שאקי הי"ו א לאנג יעריגער תושב נתני' מבני אחינו הספרדים.

פארנאכטס איז כ"ק אדמו"ר מצאנז שליט"א ארויסגעקומען פון ביתו נאווה קודש לרחובה של עיר וואו דער רבי האט מיטגעהאלטן די תהלוכה און זיך ארויסגעלאזט אין א ריקוד נלהב מיט די ספר תורה, אנקומענדיג צום היכל הכולל איז ווידער געשאפן געווארן ריקודין לכבוד התורה, וואו די רבי האט מכבד געווען אנשים חשובים און דער נדבן ובני משפחתו, און אפגעראכטן די הקפות מיטן ספר תורה, דערנאך האט די רבי פארגעזאגט לדוד מזמור בקול חוצב.

עס האט נאכגעפאלגט מיט א שולחן לחיים רבתי לגומרה של תורה, ביי וועלכן דער רבי האט מכבד געווען מיט דברי ברכה די ספרדישע מגיד מישרים הרה"ג ר' אברהם אבוהב שליט"א רב קהילת "מדרש תלפיות" אין נתניה, דערנאך האט די רבי שליט"א משמיע געווען לענגערע דברות קודש אויף לשון הקודש, וואו די רבי האט מקדים געווען אז כאטש עס קומט איהם אן שווער צו רעדן די שפראך, וועט ער זיך אנשטרענגען לכבוד העם הנאספים, די רבי שליט"א האט ארומגערעט בגודל מעלת התורה מיט חסד, און בשבחו פונעם נדבן און זיין פאטער ז"ל וואס איז געווען אדוק ומקושר צו הרה"ק בעל שפע חיים מצאנז קלויזענבורג זי"ע פון יונגווייז אן.

ביים פארלאזן די מעמד האט די רבי אנגעזאגט פאר די ארומיגע אז מ'זאל זיך נישט אפלערנען פון די יוצא מן הכלל, נאר מקפיד זיין צו רעדן בלויז די אידישע שפראך כמסורת אבותינו.