שטאט לאנדאן מיטגעהאלטן זעלטן פייערליכע הדלקה דורך המשפיע הרה"צ ר' שמעלקא בידערמאן שליט"א מלעלוב

זונטאג פ' במדבר • כ''ג אייר תשפ"ו | בחצרות הקודש

א ציבור עצום פון אריבער צוויי טויזנט אידן תושבי לאנדאן האבן דעם דינסטאג ל"ג בעומר מיטגעהאלטן דעם זעלטן פייערליכע הדלקה, וואס איז אפגעראכטן געווארן בראשות המשפיע הרה"צ רבי שמעלקא בידערמאן שליט"א מלעלוב-לאנדאן, וואו מען האט פאר לאנגע שעות זיך געקאכט בתורת הרשב"י מיט א טיפע קשר צום רבונו של עולם.

די הדלקה איז פארגעקומען ביום ל"ג בעומר, אויפ'ן ריזן שטח ביים חצר פונעם אולם "יסודי התורה", וואס איז געוועהן אויסגערישט מיט פארענטשעס און א גיגאנטישער חלל אינדערמיט צו אקאמאדירן דעם פלייץ משתתפים מאסן תושבי העיר אין צווישן זיי פילע רבנים, ואנשים חשובים פון שטאט וועלכע האבן מיט רגשי להבה מיטגעלעבט די געהויבענע שעה'ן בשמחת הרשב"י בצלו פונעם משפיע הרה"צ רבי שמעלקא שליט"א. בנועם לשונו האט דער משפיע אויפגעפלאמט די הערצער לאביהם שבשמים, און מעורר געווען צו מתפלל זיין למען חולי ישראל און פאר ישועות ביי גאנץ כלל ישראל.

הימל שפאלטענדע קולות וברקים האט זיך געהערט פונעם גאנצן ציבור ביים אויסשרייען מיטן משפיע יבטל כל הגזירות און יכול לפטור העולם, אויפן שטייגער וואו מען איז צוגעוואוינט ביי זיין ברודער המשפיע הרה"צ רבי אלימלך בידערמאן שליט"א, און דערנאך די זעלטן פרייליכע און לוסטיגע טענץ ביים אנצינדן די מדורה לכבוד התנא האלוקי רבי שמעון בר יוחאי. דער זכות ההדלקה איז אפגעקויפט געווארן דורך הרבני הנגיד ר' חיים טאגער הי"ו פאר די פאנטאסטישע סומע פון 15,000 דאללער.

בשעתן מעמד האט דער משפיע אריינגעווארפן א בגד אינעם מדורה וואו עס איז דער מנהג ישראל, און אויך מכבד געוועהן הגה"צ רבי מענדיל טאגער רב ביהמ"ד לעלוב לאנדאן אריינציווארפן א טייערע ירושלימער גארטל אינעם פייער, די מעמד האט אנגעהאלטן שעהן לאנג ביז נאנט צום זמן כניסת השבת ווען דער ציבור האט זיך צושפרייט מיט געהויבענער געמיטער.