וַאֲנִי בְּעוֹדִי אֲהַלְלָה בּוֹרְאִי • שמחת החתונה בחצרות קרעטשניף סיגעט - יאמפאלא - זלאטשוב

זונטאג פ' וישב • י"ד כסלו תשפ"ה | בחצרות הקודש

בילדער קרעדיט: א. אייזנבאך‎

אין דער שטאט בית שמש איז די וואך מיטוואך אפגעראכטן געווארן די שיינע רבישע חתונה פון א אייניקל ביי כ"ק אדמו"ר מקרעטשניף סיגעט שליט"א, די כלה א טאכטער פון בנו הגדול הגה"צ ר' נפתלי הירצקא ראזענבוים שליט"א אב"ד קרעטשניף סיגעט בית שמש, איידעם ביי הגה"צ אבד"ק סערדאהעלי בית שמש שליט"א, מיט די חתן א זון פון הרה"ג ר' משה לאנדא שליט"א אבד"ק יאמפאלא, די שמחה איז פארגעקומען אין די הכרמים זאל אין שטאט וואו הונדערטער חסידים פון נאנט און ווייט האבן מיטגעהאלטן די שמחה בבית צדיקים.

ביים מעמד החופה זענען מכובד געווארן מיט די כיבודים ווי פאלגענד: סידור קידושין די זיידע כ''ק האדמו''ר מקרעטשניף סיגעט שליט"א, קריאת הכתובה די זיידע מצד החתן הרה"ג ר' יוסף דוב לאנדא אב"ד זלאטשוב קרית יואל, ברכות ראשונות די זיידע הגה"צ אב"ד סערדאהעלי בית שמש שליט"א, און ברכה אחריתה די פעטער מצד הכלה כ"ק אדמו"ר מבאלחוב שליט"א, נאכן חופה האט די זיידע האד' מקרעטשניף סיגעט מאציל געוועהן ברכת קדשו לרוב פאר אלע משתתפים ביי די שמחה און מען האט זיך ארויסגעלאזט אין א מחול לצדיקים, לקול תרועת הזמר.

בשעת די חתונה האבן באשיינט די שמחה פילע אדמור"ים, קרובי המשפחה און די רבני העיר בית שמש, ובראשם די פעטערס האדמור"ים מראחמיסטריווקא, ביאלא בני ברק, באלחוב, און האדמור"ים מלעלוב, טרעבישאן, קרעטשניף טשערנאוויץ , נחלת אהרן, קאלאשין, הגה"צ רבי יהושע רוזנבערגער חב"ץ בד"ץ העדה החרדית און נאך.

מיט ברכת המזון איז מכובד געווארן דער מחותן אבי החתן הרה"ג ר' משה לאנדא שליט"א אבד"ק יאמפאלא און מיט די שבע ברכות די פעטער האחים לבית משפחת לאנדא. 

כחצות הלילה בעת נעילת שער האט מען אויפגערופן די חשובע זיידע'ס פון ביידע צדדים, און צום קלימאקס דער מצוה טאנץ פונעם גרויסן זיידן די קרעטשניפער רבי וואס האט זיך אנגעפאַנגען מיט'ן זינגען בצוותא חדא ניגוני התעוררות כנהוג מקדמת דנא, דערנאך האט דער רבי שליט"א געטרונקען לחיים, געוואונטשן ברכות, און געטאנצט לפני הכלה מיט גרויס התלהבות כדרכו. דערנאך איז דער פעטער כ"ק אדמו"ר מראחמיסטריווקא שליט"א געטאנצן מצוה טאנץ, נאכגעפאלגט מיט די מצוה טאנץ פונעם חתן לפני הכלה ווען עס איז שוין געוועהן 5:00 פארטאגס.